ބޮލީވުޑްގެ ކިންގު ޝާހްރުކް ހާންގެ ކުރިއަށް އޮތް ފިލްމު "ކިންގް" މިއަހަރުގެ ކްރިސްމަސް ބަންދާ ދިމާކޮށް ރިލީޒްކުރުމަށް ނިންމާފައިވާ ކަމަށް ރިޕޯޓްތައް ބުނެފި އެވެ.
ޝާހްރުކް ހާން އެންމެ ފަހުން ކުޅުނު "ޕަތާން" އާއި "ޖަވާން" އަށް ލިބުނު ބޮޑު ކާމިޔާބީއަށްފަހު، އޭނާގެ ފޭނުން ތިބީ އާ ފިލްމަކަށް ވަރަށް ބޮޑަށް އިންތިޒާރުކޮށްގެންނެވެ. މިހާރު ޝޫޓިން ކުރިއަށްދާ މި ފިލްމުގެ ފުރަތަމަ ފެނިލުން އާންމުކޮށްފައިވަނީ 2025 ވަނަ އަހަރު ޝާހްރުކްގެ އުފަންދުވަހާ ދިމާކޮށެވެ. "ޕަތާން" ގެ ޑައިރެކްޓަރު ސިދާތު އާނަންދު ޑައިރެކްޓްކުރާ މި ފިލްމުގައި މަޝްހޫރު ގިނަ ތަރިންތަކެއް ފެނިގެންދާނެ އެވެ. އޭގެ ތެރޭގައި ދީޕިކާ ޕަދުކޯން، އަބީޝެކް ބައްޗަން، ރާނީ މުކަރުޖީ، ޖައިދީޕް އަހްލާވަތު، އަރުޝަދު ވަރްސީ، ސުހާނާ ހާން އަދި އަބޭ ވަރުމާ ހިމެނެ އެވެ.
ބޮލީވުޑް ހަންގާމާއަށް މައުލޫމާތު ދިން މަސްދަރަކުން ބުނި ގޮތުގައި، ޝާހްރުކް އާއި ސިދާތު ފިލްމު ރިލީޒްކުރުމަށް އެންމެ ބޮޑަށް ބެލީ 2026 ވަނަ އަހަރުގެ ޑިސެމްބަރު 4 ނުވަތަ ޑިސެމްބަރު 25 އެވެ. އެކި ކަންކަމަށް ރިއާޔަތްކުރުމަށްފަހު، އެންމެ ފަހުން ނިންމީ މި އެކްޝަން ފިލްމު އެ އަހަރުގެ ކްރިސްމަސްގައި ބެލުންތެރިންނަށް ދޫކޮށްލުމަށެވެ.
Advertisement
މި ތާރީހު ކަނޑައެޅުމުގައި ބޮޑު ސަބަބެއް ވަނީ މެދުވެރިވެފަ އެވެ. އެއީ 2026 ވަނަ އަހަރުގެ ޑިސެމްބަރު މަހުގެ ކުރީކޮޅު ރިލީޒްކުރުމަށް ހަމަޖެހިފައިވާ "ރާމާޔަން" ފިލްމަށް ފުރުސަތު ދިނުމެވެ. ޝާހްރުކް އާއި ސިދާތު ބޭނުންވަނީ "ރާމާޔަން" ފަދަ ބޮޑު ފިލްމެއްގެ ވިޔަފާރިއަށް އެއްވެސް އަސަރެއް ނުކުރާނެ ގޮތަކަށް "ކިންގް" ނެރުމަށެވެ. އެހެންކަމުން، ދެ ފިލްމުގެ ދެމެދުގައި 45 ދުވަހުގެ މުއްދަތެއް ބޭއްވުމަށްޓަކައި ކްރިސްމަސް ދުވަހު ފިލްމު ނެރުމަށް މިހާރު ވަނީ ނިންމާފަ އެވެ.
މި ތާރީހުގައި ފިލްމު ރިލީޒްކުރުމުން ބޮލީވުޑްގެ އެހެން ބޮޑު ފިލްމަކާ ވާދަކުރަން ނުޖެހި ބޮޑު އާމްދަނީއެއް ލިބޭނެ ކަމަށް ބެލެވެ އެވެ. ހޮލީވުޑްގެ "އެވެންޖާސް: ޑޫމްސްޑޭ" އޭގެ ހަފުތާއެއް ކުރިން ރިލީޒްކުރި ނަމަވެސް، ހިންދީ ފިލްމު ބަލާ މީހުންނަށް ޝާހްރުކް ހާންގެ ފިލްމެއް ބޮޑު އިސްކްރީނުން ބަލާލުމަށް ލިބޭ ފުރުސަތަކީ އެއަށްވުރެ ބޮޑު އުފަލެއް ކަމަށް ރިޕޯޓްތަކުން ބުނެ އެވެ.
ރަސްމީކޮށް ތާރީހާއް އަދި އިއުލާނު ނުކުރި ނަމަވެސް ކުރިއަށް އޮތް ހަފުތާގެ ތެރޭގައި މިކަން ރަސްމީކޮށް އިއުލާނުކުރާނެ ކަމަށް މައުލޫމާތު ލިބެ އެވެ.
