ރައީސް ނަޝީދާއި އިބްރާހިމް ސޯލިހުގެ ފެކްޝަނާ ދެމެދު ކޯޅުން އުފެދި 2023 ވަނަ އަހަރު ނަޝީދުގެ ފެކްޝަނުން އުފެއްދި ދަ ޑިމޮކްރެޓްސް އިން ކުރިއަށް އޮތް ލޯކަލް ކައުންސިލް އިންތިހާބުގައި ވާދަކުރައްވަން ނިންމައިފި އެވެ.
ރައީސް ނަޝީދު އިސްވެ އުފެއްދެވި ޑިމޮކްރެޓްސް އިން ވަކިވެ އެމަނިކުފާނު ވަނީ އަލުން އަނބުރާ ނިމިދިޔަ އަހަރުގެ ޖޫން މަހު އެމްޑީޕީއާ ގުޅިވަޑައިގެންފަ އެވެ. ނަޝީދާއެކު ޑިމޮކްރެޓްސްގެ ގިނަ އިސްވެރިންތަކެއް އެމްޑީޕީއާ ގުޅިފައިވާއިރު، ދަ ޑިމޮކްރެޓްސް އުވާލަން ވެސް ނިންމެވި އެވެ.
Advertisement
ސަރުކާރު ޖަވާބުދާރީ ކުރުވުމަށާއި 2028 ވަނަ އަހަރު ރައީސް ޑރ. މުޢިއްޒުގެ ވެރިކަން ނިންމެވުމުގެ މަގްސަދުގައި ރައީސް ނަޝީދުގެ އިތުރުން ގިނަ މެންބަރުންތަކެއް އެމްޑީޕީއާ ގުޅިވަޑައިގެން ގިނަ މަސައްކަތްތަކެއް ކުރައްވަން ނިންމެވިއިރު، ނަޝީދާއި ސޯލިހުގެ ފެކްޝަނާ ދެމެދު އަދިވެސް ގިނަ މައްސަލަތަކެއް ހުރިކަން ފާހަގަ ކުރެވެ އެވެ.
މީގެ އެންމެ ބޮޑު ހެއްކަކީ ޗެއާޕާސަން ކަމުގެ މަގާމުން ފައްޔާޒު އިސްމާއިލް ވަކިވެ، އެ މަގާމަށް މީހަކު އިންތިހާބުކުރުމަށް ބޭއްވި ޖަލްސާގައި ހިޔާލުތަފާތުވެ ދެ ފެކްޝަނުން ހޫނުކުރުމެވެ. އެ ޖަލްސާގައި މީހަކު އިންތިހާބުނުކުރެވުނު ނަމަވެސް ފަހުން ވަނީ އިތުރު ޖަލްސާއެއް ބާއްވާ އެ މަގާމަށް މީހަކު އިންތިހާބުކޮށްފަ އެވެ.
މީގެ އިތުރުން އެމްޑީޕީގެ ވަޓްސްއެޕް ގްރޫޕުގައި ރައީސް ނަޝީދު، އިބްރާހިމް ސޯލިހަށް ބަހުގެ ހަމަލާތަކެއް ފޮނުވައި ޒުވާބެއް ހިންގާފައިވާކަން ވެސް ފާހަގަކުރެވެ އެވެ.
ލޯކަލް ކައުންސިލް އިންތިހާބަށް އެމްޑީޕީގެ ފަރާތުން މާލެ ސިޓީގެ މޭޔަރު ކަމަށް ދެ ފެކްޝަނުން، އާދަމް އާޒިމާއި އަލީ އާޒިމް ޝައުގުވެރިކަން ފާޅުކޮށްފައިވާތީ މިދިޔަ ހުކުރު ދުވަހު ނެގުނު ޕްރައިމަރީ ވޯޓުގައި އާދަމް އާޒިމް ވަނީ ބޮޑު ތަފާތަކުން އިންތިހާބު ކާމިޔާބުކޮށްފަ އެވެ.
އިންތިހާބަށް ފަހު ދެ ފެކްޝަނުންވެސް ދިޔައީ އެކުގައި ތިބިކަން ދެއްކުމުގެ ގޮތުން ވީޑިއޯތައް ސޯޝަލް މީޑިއާގައި ހިއްސާކުރަމުންނެވެ. އެހެން ނަމަވެސް މިރޭ މި ފެންނަން ފެށީ އެހެން މަންޒަރެކެވެ.
ދަ ޑިމޮކްރެޓްސް އިން ކުރިއަށް އޮތް ލޯކަލް ކައުސިލް އިންތިހާބަށާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބަށް އެ ޕާޓީގެ ފަރާތުން ވާދަކުރުމަށް ފުރުސަތު ހުޅުވާލާފައި މިވަނީ އެ ޕާޓީ އުވާލަން ވެސް ޕާޓީގެ އިސްވެރިން ނިންމާފައިވާ ދަނޑިވަޅެއްގަ އެވެ.
ދަ ޑިމޮކްރެޓްސް އުވާލަން އެ ޕާޓީގެ ނެޝަނަލް އެސެމްބްލީން ނިންމީ 2025 ވަނަ އަހަރު ޖޫން މަހުގެ 17 ވަނަ ދުވަހު ބޭއްވި ބައްދަލުވުމުގައި ގަރާރެއް ފާސްކޮށްގެންނެވެ. އެހެންކަމުން ކުރިއަށް އޮތް އިންތިހާބުގައި އެ ޕާޓީން ވާދަކުރަން ނިންމެވި މަގްސަދު ސާފެއް ނޫނެވެ.
