މަޝްހޫރު ހޮލީވުޑް އެކްޓަރު ޖޯނީ ޑެޕް އާއި އޭނާގެ ރޮކް ބޭންޑް "ހޮލީވުޑް ވެމްޕަޔާސް" އިން އިނގިރޭސިވިލާތުގެ ޔޯކްޝަޔާގެ ދެ ސަރަހައްދެއްގައި ޕާފޯމް ކުރުމަށް ތައްޔާރުވެއްޖެ އެވެ.
މި ބޭންޑުގައި ޖޯނީ ޑެޕްގެ އިތުރުން ރޮކް މިއުޒިކްގެ ދުނިޔޭގައި ނަންމަޝްހޫރު ފަންނާނުން ކަމަށްވާ އެލިސް ކޫޕާ، ޓޮމީ ހެންރިކްސަން އަދި އެއަރޯސްމިތްގެ ގިޓަރިސްޓް ޖޯ ޕެރީ ހިމެނެ އެވެ. މިއީ ފާއިތުވި ތިން އަހަރު ދުވަހުގެ ތެރޭގައި މި ބޭންޑުން ލައިވްކޮށް ހުށަހަޅައިދޭ ފުރަތަމަ ފަހަރެވެ.
މި ޓުއާ ރަސްމީކޮށް ފެށުމަށް ހަމަޖެހިފައިވަނީ ލަންޑަންގެ އޯ2 (O2) އެރީނާގަ އެވެ. އޭގެ ފަހުން އޮގަސްޓް 15 ގައި ސްކާބަރާ އޯޕަން އެއަރ ތިއޭޓަރުގައި އަދި އޮގަސްޓް 22 ގައި ހެލިފެކްސްގެ "ދަ ޕީސް ހޯލް" ގައި މި ބޭންޑުގެ ފޯރިގަދަ ޝޯތަކެއް ބޭއްވުމަށް ވަނީ ތާވަލުކުރެވިފަ އެވެ.
Advertisement
ޖޯނީ ޑެޕް މީގެ ކުރިންވެސް ވަނީ ޔޯކްޝަޔާގެ ސަޕޯޓަރުންނަށް ކުއްލި ހައިރާންކަމެއް ދީފައެވެ. އެގޮތުން 2022 ވަނަ އަހަރުގެ މެއި މަހު، އޭނާގެ ކުރީގެ އަނބިމީހާ އެމްބާ ހާޑްއާއެކު ކުރިއަށްދިޔަ އަބުރުގެ ދައުވާގެ ޝަރީއަތް ނިމި، ހުކުމާ މެދު ގޮތެއް ނިންމުމަށް ފަނޑިޔާރުން މަޝްވަރާ ކުރައްވަމުން ދަނިކޮށް، ޝެފީލްޑްގެ ސިޓީ ހޯލް ސްޓޭޖުން ޖެފް ބެކްއާއެކު އޭނާ ފެނިގެންދިޔަ އެވެ. އަދި ޖެހިގެން އައި 2023 ވަނަ އަހަރު، ހޮލީވުޑް ވެމްޕަޔާސްގެ ޓުއާ ފެށީވެސް ސްކާބަރާގައި ބޭއްވި ހުރިހާ ޓިކެޓެއް ހުސްވި ކާމިޔާބު ޝޯއަކުންނެވެ.
ކުރިއަށް އޮތް ޓުއާ އާ ގުޅޭގޮތުން ބޭންޑުން ނެރުނު ބަޔާނެއްގައި ބުނެފައިވަނީ، ސަޕޯޓަރުންނާ ބައްދަލުކޮށް ހަކަތައިން ފުރިގެންވާ ހަނދާނުން ނުފޮހެވޭ ފަދަ ރޭތަކެއް ހޭދަކުރުމަށް ކެތްމަދުވެފައި ތިބި ކަމަށެވެ. މި ދެ ކޮންސެޓްގައިވެސް ހާއްސަ މެހެމާނުންގެ ގޮތުގައި "ދަ ޑޭމްޑް" ބޭންޑުން ބައިވެރިވާނެ އެވެ.
2015 ވަނަ އަހަރު އުފެދުނު މި ބޭންޑަކީ ދަ ހޫ، ލެޑް ޒެޕްލިން އަދި މޮޓޯހެޑް ފަދަ ރޮކް ލެޖެންޑުންގެ ލަވަތަކުގެ އިތުރުން އަމިއްލަ އުފެއްދުންތައް ހުށަހަޅައިދޭ ބޭންޑެކެވެ. ސްކާބަރާ އޯޕަން އެއަރ ތިއޭޓަރުގެ ޕްރޮމޯޓަރު ޖޫލިއަން މަރޭ ބުނިގޮތުގައި، 2023 ގެ ކާމިޔާބީއަށްފަހު މިފަދަ ނުފޫޒުގަދަ ބޭންޑެއް އަލުން ގެނައުމަކީ އެ ސަރަހައްދަށް ލިބޭ ވަރަށް ބޮޑު ކުރިއެރުމެކެވެ.
މި ޝޯތަކުގެ ޓިކެޓް ވިއްކަން ފެށުމަށް ހަމަޖެހިފައިވަނީ މި މަހުގެ ފަހުކޮޅުގަ އެވެ. ސްކާބަރާގެ މި މަޝްހޫރު ސްޓޭޖުން މީގެ ކުރިން ވިލް ސްމިތް ފަދަ ތަރިން ފެނިފައިވާއިރު، 2026 ވަނަ އަހަރަށް މައިކަލް ބޫބްލޭ އާއި ބަސްޓީލް ފަދަ ފަންނާނުންގެ ޝޯތައްވެސް މިހާރު ވަނީ ތާވަލުކުރެވިފަ އެވެ.
