ދިވެހިރާއްޖޭގެ ފައިނޭންސް ދާއިރާއަށް ބޭންކިން ޕްރޮފެޝަނަލުން ތަރައްގީ ކުރުމަށް ބޭންކް އޮފް މޯލްޑިވްސް (ބީއެމްއެލް)ގެ އެކަޑެމީ އިން އޭޝިއަން އިންސްޓިޓިއުޓް އޮފް ޗާޓާޑް ބޭންކާސް (އޭއައިސީބީ) އާއެކު އެމްއޯޔޫއެއްގައި ސޮއިކޮށްފި އެވެ.

މި އެއްބަސްވުމުގައި ބީއެމްއެލްގެ ފަރާތުން ސޮއިކޮށްފައިވަނީ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފު އެވެ. އޭއައިސީބީގެ ފަރާތުން ޗީފް އެގްޒެކެޓިވް އެޑްވާޑް ލިންގް އެވެ. މި އެއްބަސްވުމުގެ ދަށުން ޗާޓާޑް ބޭންކިން އުނގެނުމުގެ މަގުތައް ފުޅާކުރުމާއި، ޕްރޮފެޝަނަލް މިންގަނޑުތައް ހަރުދަނާކުރުމުގެ އިތުރުން މުޅި އޯގަނައިޒޭޝަނުގައި މެދުނުކެނޑި ހުނަރު ތަރައްގީކުރުމަށް އެހީތެރިވެދޭނެ އެވެ.

_{ބީއެމްއެލްގެ ފަރާތުން ސޮއިކޮށްފައިވަނީ ސީއީއޯ އަދި އެމްޑީ ޝަރީފު، އޭއައިސީބީގެ ފަރާތުން ސޮއިކޮށްފައިވަނީ ޗީފް އެގްޒެކެޓިވް އެޑްވާޑް ލިންގް---ފޮޓޯ: ބީއެމްއެލް}

ބޭންކުގެ ތަމްރީނާއި ތަރައްގީއަށް ހާއްސަކުރެވިފައިވާ ބީއެމްއެލް އެކަޑަމީއަކީ މި މަސައްކަތުގައި އެންމެ މުހިންމު ދައުރެއް އަދާކުރާ ގޮތްޕެވެ. މި އެކަޑަމީން ދަނީ މެދުނުކެނޑި އުނގެނުމުގެ ފުރުސަތުތަކާއި، ހާއްސަ ތަމްރީނު ޕްރޮގްރާމްތަކުގެ އިތުރުން، ދިވެހި ހުނަރުވެރިން ބިނާކޮށް ފަންނީ ގާބިލުކަން އިތުރުކުރުމަށްޓަކައި ބައިނަލްއަގުވާމީ ފެންވަރުގެ ތަރައްގީގެ ހަރަކާތްތައް ހިންގަމުންނެވެ. އަލަށް އުފެދުނު މި ބައިވެރިވުމާއެކު، އެކަޑަމީން ފޯރުކޮށްދޭ ހިދުމަތްތައް އިތުރަށް ފުޅާވެ، ވަޒީފާގެ އެކި މަރުހަލާތަކުގައި ތިބި މުވައްޒަފުންނަށް ދެވޭ ތަމްރީނުތަކުގެ ފެންވަރު އިތުރަށް ރަނގަޅުވެގެންދާނެ އެވެ.

މާލީ ދާއިރާއަށް އަންނަމުންދާ ޑިޖިޓަލް ބަދަލުތަކާއި، ގަވާއިދުތަކަށް އަންނަ އިސްލާހުތަކުގެ އިތުރުން ކަސްޓަމަރުންގެ އުންމީދުތައް މަތިވަމުންދާ މި ދަނޑިވަޅުގައި، ބޭންކުގެ އިންސާނީ ވަސީލަތްތައް ކުރިއެރުވުމަކީ ބީއެމްއެލްއިން އެންމެ އިސްކަންދޭ އެއް ކަންތައް ކަމުގައި އެ ބޭންކުން ވަނީ ފާހަގަކޮށްފައެވެ. އޭއައިސީބީއާ އެކު ގާއިމުކުރި މި ގުޅުމަކީ ދިވެހި ބޭންކިންގް ދާއިރާގެ ފަންނީ ބޭފުޅުންނަށް ކުރިމަތިވާ ގޮންޖެހުންތަކަށް ތައްޔާރުވުމަށާއި، ފަންނީ އަދި އަހުލާގީ މިންގަނޑުތައް އެންމެ މަތީ ދަރަޖައިގައި ހިފެހެއްޓުމަށް އެޅުނު މުހިންމު ފިޔަވަޅެކެވެ.

މި ޕާޓްނަޝިޕަކީ މުއައްސަސާގެ ތެރޭގައި މުޅި އުމުރަށް އުނގެނުމާއި، ހުނަރު ތަރައްގީކުރުމަށް ބޭންކުން ދޭ އަހައްމިއްޔަތުކަން ހާމަކޮށްދޭ ކަމެއް ކަމަށް ބޭންކުން ބުނެއެވެ. އުނގެނުމުގެ ސާފު މަގުތަކެއް ކަނޑައަޅައި، ބައިނަލްއަގުވާމީ ގޮތުން ބަލައިގަންނަ ފެންވަރުގެ ސަނަދުތައް ހާސިލުކުރުމުގެ ފުރުސަތު ފަހިކޮށްދީގެން، ބީއެމްއެލް އިން އަމާޒު ހިފާފައިވަނީ މުވައްޒަފުން ބާރުވެރިކުރުވައި، ރާއްޖޭގެ ބޭންކިން ދާއިރާ ދެމެހެއްޓެނިވި ގޮތެއްގައި ކުރިއެރުވުމަށް އެހީތެރިވުމަށެވެ.