ލޯކަލް ކައުންސިލް އިންތިހާބަށާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބަށް ކުރިމަތިލުމުގެ ފުރުސަތު އަންނަ ހޮނިހރު ދުވަހު ހުޅުވާލާނެ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.

އިންތިހާބާ ބެހޭ މަރުކަޒުގައި މިއަދު ބޭއްވި ނޫސްވެރިންގެ ބައްދަލުވުމުގައި އީސީގެ ރައީސް އަހްމަދު ޒާހިދު ވިދާޅުވީ އިންތިހާބުތަކަށް ކުރިމަތިލާ ކެންޑިޑޭޓުންނަށް އަންނަ ހޮނިހިރު ދުވަހު ހުޅުވާލާނެ ކަމަށާއި އަދި އަންނަ ފެބްރުއަރީ މަސްތެރޭ މުއްދަތު ހަމަވާނެ ކަމަށެވެ. އިންތިހާބުތަކަށް ކުރިމަތިލެވޭނީ އިލެކްޝަން ކޮމިޝަންސްގެ ޕޯޓަލް މެދުވެރިކޮށް ކަމަށް ވެސް ޒާހިދު ވިދާޅުވި އެވެ.

ޒާހިދު ވިދާޅުވީ ޕޯޓަލް މެދުވެރިކޮށް މިހާރުވެސް ފޯމު ފުރުމުގެ ކަންކަން ކުރިއަށް ގެންދެވޭނެ ކަމަށާއި ނަމަވެސް ފޯމު ހުށަހެޅޭނީ އަންނަ ހޮނިހިރު ދުވަހު ކަމަށެވެ. އެގޮތަށް ކުރިއާލައި ހުޅުވާލީ ޕޯޓަލްގެ އެއްވެސް މައްސަލައެއް ހުރިތޯ ދެނެގަންނަން ކަމަށާއި ނަމަވެސް މިހާތަނަށް އެފަދަ ޝަކުވާއެއް ލިބިފައިނުވާ ކަމަށް އޭނާ ވިދާޅުވި އެވެ.

ޒާހިދު ވިދާޅުވީ މި މަހުގެ ހަވަނަ ދުވަހުން ފެށިގެން ފޯމު ފުރުސަތު އީސީން ހުޅުވާލާފައިވާ ކަމަށާއި މިހާތަނަށް 1،300 މީހުން ފޯމު ފުރުމުގެ މަރުހަލާ ކުރިއަށްގެންދާ ކަމަށެވެ. ފޯމު ހުށަހެޅޭނީ ހުކުރު ދުވަސް ފިޔަވައި ހެނދުނު 08:30 އިން ފެށިގެން ހަވީރު 15:30 އަށެވެ. ހުކުރު ދުވަހު ފޯމު ހުށަހެޅޭނެ ވަގުތަކީ ހަވީރު 15:30 އިން ފެށިގެން އިރުއޮއްސި 18:00 އާ ދެމެދުގެ ވަގުތުގަ އެވެ.

ލޯކަލް ކައުންސިލް އިންތިހާބަށް ޕާޓީތަކުން ތައްޔާރުވުމުގެ ގޮތުން އެންމެ މެންބަރުން ގިނަ ޕާޓީ ކަމަށްވާ ޕީއެންސީން އެ ޕާޓީގެ ޕްރައިމަރީ މިދިޔަ މަހު ވަނީ ބާއްވާފަ އެވެ. ވާދަވެރި އެމްޑީޕީގެ ޕްރައިމަރީ އޮތީ މާދަމާ އެވެ.