މިއަހަރުގެ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި ވޯޓުލުމުގެ ހައްގު ލިބިފައިވާ މީހުންގެ ލިސްޓަށް މިހާތަނަށް 315 ޝަކުވާ ހުށަހަޅާފައިވާ ކަމަށް އިލެކްޝަންސް ކޮމިޝަން (އީސީ) އިން ހާމަކޮށްފި އެވެ.

އިލެކްޝަންސް ކޮމިޝަނުން އާންމުކޮށްފައިވާ ތަފާސް ހިސާބުތަކަށް ބަލާއިރު، ޝަކުވާ ހުށަހެޅުމުގެ ފުރުސަތު ހުޅުވާލުމާ ގުޅިގެން މިއަދު ހަވީރު 18:00 އާ ހަމައަށް 315 ފަރާތަކުން ވަނީ ޝަކުވާ ހުށަހަޅާފަ އެވެ. އީސީން ބުނިގޮތުގައި، ކޮމިޝަނުގެ މައި ޕޯޓަލް މެދުވެރިކޮށް ލިބިފައިވާ މި ޝަކުވާތަކުގެ ތެރޭގައި މައިގަނޑު ގޮތެއްގައި ހިމެނެނީ ރަޖިސްޓަރީގައިވާ އެޑްރެސް ބަދަލުކުރުމާއި، ރަށްވެހިކަން ބަދަލުވެފައިވާ ފަރާތްތަކުގެ މައުލޫމާތު އިސްލާހުކުރުމެވެ. މީގެ އިތުރުން، ނިޔާވެފައިވާ ފަރާތްތަކުގެ ނަން ލިސްޓުގައި ހިމެނިފައިވާތީ އެ ނަންތައް އުނިކުރުމަށްވެސް ގިނަ އަދަދެއްގެ ޝަކުވާ ލިބިފައިވާ ކަމަށް އެ ކޮމިޝަނުން ބުންޏެވެ.

ވޯޓު ދިނުމުގެ ހައްގު ލިބިގެންވާ މީހުންގެ ރަޖިސްޓަރީއަށް ޝަކުވާ ހުށަހެޅުމުގެ ފުރުސަތު އަންނަ އާދިއްތަ ދުވަހުގެ މެންދުރުފަހު 03:00 ގެ ނިޔަލަށް ވަނީ ހުޅުވާލެވިފަ އެވެ. އެހެންކަމުން، އެ މުއްދަތުގެ ކުރިން ހުރިހާ ރައްޔިތުންވެސް އީސީން އާންމުކޮށްފައިވާ ރަޖިސްޓަރީ ޗެކްކޮށް، މައުލޫމާތުގެ ސައްހަކަން ކަށަވަރުކުރުމަށްފަހު، އެއްވެސް މައްސަލައެއް އުޅޭނަމަ ޝަކުވާ ހުށަހެޅުމަށް އެ ކޮމިޝަނުން ވަނީ އިލްތިމާސްކޮށްފަ އެވެ.

ޝަކުވާ ހުށަހަޅާއިރު، ރަޖިސްޓަރީއަށް މީހަކު އިތުރުކުރުމަށް ނުވަތަ އުނިކުރުމަށް ނުވަތަ މައުލޫމާތަކަށް ބަދަލު ގެނައުމަށް އެދޭނަމަ، އެ ޝަކުވާއެއްގެ ސައްހަކަން ސާބިތުކޮށްދޭނެ ރަސްމީ ލިޔުމެއްގެ ކޮޕީ ހުށަހަޅަންޖެހެ އެވެ. ސިޔާސީ ޕާޓީތަކުން ޝަކުވާ ހުށަހަޅާނީ އެ ފަރާތްތަކަށް ހާއްސަކޮށްފައިވާ "ސިމެދަ" ޕޯޓަލް މެދުވެރިކޮށް ކަމަށްވެސް އީސީން ބުންޏެވެ.

ވޯޓާސް ލިސްޓުގައިވާ މައުލޫމާތު ޗެކްކުރުމަށްޓަކައި އިލެކްޝަންސް ކޮމިޝަނުގެ ވެބްސައިޓުގެ އިތުރުން، (VR (space) ID number) ޖެއްސެވުމަށްފަހު 1414 އަށް އެސްއެމްއެސް ކޮށްގެންވެސް ބެލޭނެ އިންތިޒާމު ވަނީ ހަމަޖައްސާފަ އެވެ. އަދި އިންތިހާބާ ގުޅޭ އިތުރު މައުލޫމާތު ސާފުކުރުމަށް ބޭނުންވާ ފަރާތްތަކުން އެ ކޮމިޝަނުގެ ކޯލް ސެންޓަރު ނަންބަރު 1414 އަށް ގުޅުއްވުމަށްވެސް އެ ކޮމިޝަނުން ވަނީ އެދިފަ އެވެ.