އިންޑިއާގެ ދެކުނުގެ ސްޓޭޓެއް ކަމަށްވާ ތަމިލްނާޑޫގެ ފިލްމީ ދާއިރާގެ އެންމެ ފުންނާބުއުސް މަޝްހޫރު ސުޕަސްޓާރު ސީ. ޖޯސެފް ވިޖޭ (ތަލަޕަތީ ވިޖޭ)، އޭނާގެ ކާމިޔާބު ފިލްމީ ކެރިއަރު ދޫކޮށްލުމަށްފަހު ފުރިހަމައަށް ސިޔާސީ މައިދާނަށް ނުކުތުމަށް ނިންމައިފި އެވެ.
ތަމިލްނާޑޫއަކީ ފިލްމީ ދާއިރާއާއި ސިޔާސީ ދާއިރާ ނުހަނު ބޮޑަށް ލާމެހިފައިވާ ތަފާތު ސަގާފަތެއް އޮންނަ ސްޓޭޓެކެވެ. މީގެ ކުރިންވެސް އެމް.ޖީ. ރާމަޗަންދުރަން (އެމް.ޖީ.އާރު) އާއި ޖަޔަލަލީތާ ފަދަ ތަރިން ވަނީ ފިލްމީ ދާއިރާއިން ސިޔާސީ ދާއިރާއަށް ނުކުމެ، އެ ސްޓޭޓުގެ ޗީފް މިނިސްޓަރުކަމުގެ މަގާމު ފުރުއްވާފައެވެ. މީގެ އިތުރުން ރަޖްނީކާންތު، ކަމަލް ހަސަން، ކުޝްބޫ އަދި ވިޖޭކާންތު ފަދަ ތަރިންނަކީވެސް މި މިދާއިރާއިން މަސައްކަތްކޮށްފައިވާ ތަރިންނެވެ.
ވިޖޭ ސިޔާސީ ދާއިރާއަށް ރަސްމީކޮށް ވަދެފައިވަނީ 2024 ވަނަ އަހަރު އޭނާ އުފެއްދި "ތަމަޅަގަ ވެއްޓްރީ ކަޒަގަމް" (ޓީ.ވީ.ކޭ) ޕާޓީއާ އެކުގަ އެވެ. އުމުރުން 51 އަހަރުގެ ވިޖޭ ހާމަކުރި ގޮތުގައި، މި މަހު ރިލީޒްކުރާ އޭނާގެ ފަހު ފިލްމު "ޖަނަ ނަޔަގަން" (ރައްޔިތުންގެ ބަތަލު) އަށްފަހު އޭނާ ފިލްމީ މަސައްކަތްތަކުން އެއްކޮށް ދުރަށްޖެހޭނެއެވެ.
މި ނިންމުން ނިންމި ސަބަބާ ގުޅޭގޮތުން ވިޖޭ ބުނެފައިވަނީ، ސިޔާސީ ދާއިރާއަކީ ހަމައެކަނި ހުސްވަގުތުތަކުގައި ކުރާ މަސައްކަތަކަށް ވެގެން ނުވާނެ ކަމަށެވެ. ރައްޔިތުންނަށްޓަކައި މަސައްކަތް ކުރާ ލީޑަރަކީ އެ މަސައްކަތަށް ފުރިހަމައަށް ވަގުތުދީ ހުސްވެފައިވާ މީހަކަށް ވާންޖެހޭނެ ކަމަށް އޭނާ ގަބޫލުކުރެ އެވެ.
ތާރީހަށް ބަލާއިރު، ތަމިލްނާޑޫގެ ސިޔާސީ މައިދާނުގައި ކާމިޔާބު ހޯދާފައިވަނީ ފިލްމީ މަސައްކަތް ދޫކޮށް ސިޔާސީ ކަންކަމަށް މުޅިން ހުސްވި އެމް.ޖީ.އާރު އާއި ޖަޔަލަލީތާ ފަދަ ބޭފުޅުންނަށެވެ. އަނެއްކޮޅުން، ފިލްމީ މަސައްކަތާއި ސިޔާސީ މަސައްކަތް އެކުގައި ކުރިއަށް ގެންދަން މަސައްކަތް ކުރި ކަމަލް ހަސަން ފަދަ ބޭފުޅުންނަށް އިންތިހާބުތަކުގައި ލިބިފައިވަނީ ނާކާމިޔާބީ އެވެ.
ވިޖޭގެ ސިޔާސީ ތަސައްވުރުތައް ހިމެނޭ "ޖަނަ ނަޔަގަން" ފިލްމު މި މަހު ދުނިޔޭގެ އެކި ކަންކޮޅުތަކުގެ 5،000 އަށްވުރެ ގިނަ ސިނަމާތަކުގައި ދައްކަން ފަށާނެ އެވެ. މިއީ އިންޑިއާގެ ފިލްމީ ދާއިރާގައި އެންމެ ވިޔަފާރި ރަނގަޅު އަދި އެންމެ މަގުބޫލު އެއް ތަރި، އޭނާގެ ކާމިޔާބު ކެރިއަރަށް ވަދާއީ ސަލާމް ކުރާ ފިލްމަކަށް ވެގެންދާނެ އެވެ.
