މޯލްޑިވް ގޭސްއިން ގޭހުގެ ޝިޕްމަންޓެއްގެ އެޑްވާންސަށް ދެއްކި ފައިސާ ގެއްލުނު މައްސަލަ ތަހުގީގު ކޮށްދިނުމަށް އެދި މާވަށު ދާއިރާގެ މަޖިލިސް މެންބަރު، އަހުމަދު ޝާކިރު މަޖިލީހަށް ހުށަހަޅައިފި އެވެ.

މި މައްސަލަ އަކީ ގޭސް ޝިޕްމަންޓެއްގެ އެޑްވާންސް ފައިސާގެ ގޮތުގައި މޯލްޑިވް ގޭހުން ދުބާއީގެ ކުންފުންޏެއް ކަމަށްވާ ޖަކްޝާ އެނާޖީއަށް ދެއްކި 246،645 ޑޮލަރު (3.7 މިލިއަން ރުފިޔާ) ގެއްލުނު މައްސަލަ އެވެ. މިއީ އޮކްޓޫބަރު 2024 ގައި އެކުންފުނިން އޯޑަރު ކުރި 800،000 ޑޮލަރުގެ ގޭސް ޝިޕްމެންޓުގެ 30 ޕަސެންޓަށްވާ ފައިސާ އެވެ.

އެ މައްސަލަ ތަހުގީގުކޮށްދިނުމަށް އެދި މެމްބަރު އަހްމަދު ޝާކިރު މަޖިލީހުގެ އެސްއޯއީ ކޮމިޓީއަށް ފޮނުވި ސިޓީގައި ބުނެފައިވަނީ މި މައްސަލައަކީ ސަރުކާރު ހިއްސާވާ ކުންފުންޏަކަށް ކުރެވޭ ސީރިއަސް ތުހުމަތެއް ކަމަށެވެ. އެ ފައިސާ އަދިވެސް ނުފެންނާތީ، އެ މައްސަލައިގެ ތަހުގީގެއް ހިންގައިދޭން އޭނާ ވަނީ އެދިވަޑައިގެންފަ އެވެ.

އޭނާގެ ސިޓީގައި ވަނީ މޯލްޑިވްސް ގޭސްގެ މެނޭޖިން ޑިރެކްޓަރު އަބްދުالله މުހައްމަދަށް ވެސް ތުހުމަތެއް ކުރައްވައިފަ އެވެ.

ޝާކިރު ވިދާޅުވި ގޮތުގައި ގޭސް ކުންފުނީގެ އެމްޑީ ވަނީ މަޖިލީހުގެ ވައިކަރަދޫ ދާއިރާގެ އެމްޑީޕީގެ މެމްބަރު ހުސެއިން ޒިޔާދާއި ހުޅުމާލެ ދެކުނު ދާއިރާގެ މެމްބަރު އަހުމަދު ޝަމްހީދަށް ބިރުދެއްކެވުން ކަމަށް ދޭހަވާ ގޮތަށް ސޯޝަލްމީޑިއާގައި ޕޯސްޓެއް ކުރައްވައިފަ އެވެ. އެ މައްސަލަ ވެސް ބަލައިދޭން އޭނާ ވަނީ އެދިވަޑައިގެންފަ އެވެ.

ގޭސް ޝިޕްމަންޓަށް ދެއްކި ފައިސާ ގެއްލުނު މައްސަލަ އާންމުންގެ ސަމާލުކަމަށް އައީ މިދިޔަ އަހަރުގެ އޭޕްރީލް މަހު ބޭއްވި ރައްޔިތުންގެ މަޖިލިހުގެ މާލިއްޔަތު ކޮމިޓީގެ ބައްދަލުވުމެއްގައި މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމް އެ ވާހަކަ ދެއްކެވުމުންނެވެ.

އޭނާ އޭރު ވިދާޅުވީ، އެޑްވާންސްގެ ގޮތުގައި ދެއްކި ގިނަ އަދަދެއްގެ ފައިސާ "ގެއްލުނު" އިރު، އެ ފައިސާ ހޯދުމަށް ކުރި މަސައްކަތް ކާމިޔާބު ނުވާ ކަމަށެވެ. އެހެންވެ އެ މައްސަލަ އޭރު އޭސީސީން ވެސް ތަހުގީގު ކުރަން ފެށި އެވެ. އެ ކޮމިޝަނުން ކުރަމުން އަންނަ ތަހުގީގު އަދިވެސް ދަނީ ކުރިއަށެވެ.

އެ ފައިސާ ގެއްލުނު މައްސަލަ އެސްޓީއޯއިން ވެސް ތަހުގީގު ކުރި އެވެ. އެހެންނަމަވެސް، އެ ތަހުގީގުގެ އެއްވެސް އަޕްޑޭޓެއް އެ ކުންފުނިން ހާމައެއް ނުކުރެ އެވެ. އަދި، އެކަމާ ގުޅިގެން ގޭސް އެމްޑީ، އަބްދުالله އަށް އެއްވެސް ފިޔަވަޅެއް ވެސް އަޅައިފައެއް ނުވެ އެވެ.

މި މައްސަލަ އާ ގުޅިގެން މޯލްޑިވްސް ގޭހުން އޭރު ބުނީ އެ ފައިސާ ނުލިބޭތީ ދުބާއީގެ ޖަކްޝާ އެނާޖީ ކުންފުންޏާ މެދު ގާނޫނީ ފިޔަވަޅު އަޅަން ތައްޔާރުވަމުން އަންނަ ކަމަށާއި އެކުންފުންޏާ އެކު އެކި ފަހަރު މަތިން ވާހަކަ ދައްކައިގެން ވެސް އެޑްވާންސް ފައިސާ އަނބުރާ ނުލިބޭ ކަމަށެވެ. ނަމަވެސް މިހާތަނަށް ވެސް އެއްވެސް ފިޔަވަޅެއް އެޅި ކަމެއް އަދި ސާފެއް ނޫނެވެ.