10 އަހަރުގެ ދިގު މުއްދަތަކަށްފަހު ގަލޮޅު ޕާކު މަރާމާތުކޮށް އަލުން މިއަދު ހުޅުވައިފި އެވެ.

ގަލޮޅު ޕާކު މަރާމާތުކުރުމަށްފަހު އަލުން ހުޅުވާފައި މިވަނީ ބެޑްމިންޓަން ކޯޓަކާއި، ތްރީއޮންތްރީ ބާސްކެޓް ބޯޅަ ކޯޓަކާއި އެކި އައުޓްޑޯ ޖިމަކާއި، ހިތްހަމަ ޖައްސާލުމަށް މަޑުކޮށްލާނެ ޖާގައާއި، ކުޑަކުދިން ކުޅުމަށް ހާއްސަ ސަރަހައްދަކާއި އަދި އެކި ކަހަލަ އިވެންޓްތައް ބާއްވާނެ ތަނަކާއެކު އެކި ގޮތްގޮތަށް ބޭނުން ހިފޭނެ ގޮތަކަށް ޑިޒައިން ކޮށްގެންނެވެ.

ގަލޮޅު ޕާކު ހުޅުއްވައި ދެއްވީ މާލެ ސިޓީ މޭޔަރު އާދަމް އާޒިމް އެވެ.

މިކަމާ ގުޅިގެން މޭޔަރު އާޒިމް އެކްސްގައި ހިއްސާކުރެއްވި ޕޯސްޓެއްގައި ވިދާޅުވީ، މާލެ ސިޓީގެ މޭޔަރުކަމުގައި ހޭދަކުރެވުނު މުއްދަތުގައި، ކުރެވުނު މަސައްކަތްތަކުގެ މައިގަނޑު އެއް އަމާޒަކީ، ޖާގަ ލިބެން އޮތް އެންމެ މަތީ މިންވަރަކަށް، މި ފަދަ ހިތް ފަސޭހަ މައިޒާންތައް މާލެ ސިޓީގައި ގާއިމްކޮށް، ރައްޔިތުންނަށް އުފާވެރިކަން ގެނެސް ދިނުން ކަމަށެވެ.

މި ޕާކު ބޭނުންކުރާ ހުރިހާ ފަރާތްތަކުން ޕާކު ރީތިކޮށް ބޭއްވުމަށް މޭޔަރު އާޒިމް ވަނީ އިލްތިމާސް ކުރައްވައިފަ އެވެ.