ކުރިއަށް އޮތް ރޯދަ މަހަށް ތައްޔާރުވުމަށް ހުޅުމާލެ ދެވަނަ ފިޔަވަހީގައި ވަގުތީ މާރުކޭޓެއް އެޅުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަނުން ފަށައިފި އެވެ.
އެޗްޑީސީން ބުނީ ވަގުތީ މާރުކޭޓު ހަދަނީ ދެވަނަ ފިޔަވަހީގައި ވިނަރެސް ޓަވަރު އަށަކާއި ވަގުތީ މިސްކިތާ ދެމެދު އޮންނަ ހުސް ބިމުގައި ކަމަށެވެ. 24 ގޮޅި ހުންނަ މި މާރުކޭޓަކީ ހުޅުމާލެ ދެވަނަ ފިޔަވަހިން، ފަސޭހަ ކަމާއިއެކު މޭވާއާއި ތަރުކާރީގެ ބާވަތްތައް ގަނެވޭނެ މަގު ފަހިކޮށްދިނުމަށް ކުރިއަށް ގެންދާ މަސައްކަތެއް ކަމަށާއި ގޮޅިތައް ހެދުމުގެ ޢަމަލީ މަސައްކަތްތައް ކުރިއަށް އޮތް ދެ ހަފުތާއެއްހާ ދުވަހުގެ ތެރޭގައި ނިންމާލުމަށް މަސައްކަތް ކުރަމުންދާ ކަމަށް އެޗްޑީސީން ބުންޏެވެ.
މި މާރުކޭޓުގެ ގޮޅިތައް ދޫކުރުމުގެ މަސައްކަތްތައްވެސް ކުރިޔަށް ގެންދާނީ އެޗްޑީސީންނެވެ. މި ގޮޅިތައް ދޫކުރާނީ އާއްމު އުސޫލުން ކަމަށާއި، މަސައްކަތް ނިމުނުހާ އަވަހަކަށް ގޮޅިތައް ދޫ ކުރުމުގެ މަސައްކަތް ކުރިއަށް ގެންދާނެ ކަމަށް އެޗްޑީސީން ބުންޏެވެ.
ހުޅުމާލެ ދެވަނަ ފިޔަވަހީގައި މިވަގުތު ދާއިމީ އެއްވެސް މާރުކޭޓެއް ނެތެވެ. ނަމަވެސް ކޮންމެ އަހަރަކުވެސް ރޯދަމަހާ ދިމާކޮށް ލުއިފަސޭހަ ގޮތެއްގައި މޭވާ އާއި ތަރުކާރީފަދަ ތަކެތި ލިބޭނެ ގޮތް ހަމަޖައްސަން ވަގުތީ މާރުކޭޓުތައް އެޗްޑީސީން ދަނީ ހަދަމުންނެވެ.
މި އަހަރުގެ ރޯދަ މަހުގެ ފުރަތަމަ ދުވަހުގެ ގޮތުގައި ކަލަންޑަރުގައި ވަނީ އަންނަ މަހުގެ 17 ވަނަ ދުވަހެވެ.
