ސްޓެލްކޯގެ މެނޭޖިން ޑިރެކްޓަރުގެ މަގާމުން އިއްޔެ ވަކި ކުރި އަހުމަދު ޝަމާހް ރަޝީދު އާ ގުޅޭ ކޮރަޕްޝަންގެ މައްސަލައެއް އެންޓި ކޮރަޕްޝަން ކޮމިޝަނުން ބަލަން ފަށައިފި އެވެ.
އޭސީސީގެ އޮފިޝަލަކު ވަނީ ސްޓެލްކޯގެ ކުރީގެ އެމްޑީ އާ ގުޅޭ ކޮރަޕްޝަންގެ މައްސަލައެއް އެކޮމިޝަނަށް ހުށަހެޅިފައިވާކަން ޔަގީންކޮށްދެއްވާފަ އެވެ. އެ މައްސަލަ އޭސީސީން ވަނީ ބަލަން ފަށާފަ އެވެ. ނަމަވެސް އެ މައްސަލައިގެ ތަފްސީލެއް އޮފިޝަލު ނުދެއްވަ އެވެ.
ސްޓެލްކޯގެ މެނޭޖިން ޑިރެކްޓަރުކަމުގެ މަގާމުންނާއި، ޑިރެކްޓަރުންގެ ބޯޑުން ޝަމާހު ވަކިކޮށް ޑެޕިއުޓީ މެނޭޖިން ޑިރެކްޓަރު ޑރ. އަލީ އަޒުވަރާއި ވަނީ ސްޓެލްކޯ ހިންގުން ވަގުތީގޮތުން ހަވާލުކޮށްފަ އެވެ. ޝަމާހުއާ އެކު ސްޓެލްކޯގެ ޕްރޮކިއުމަންޓް ހެޑް އަޒްހަދު ރަމީޒު ވެސް ވަނީ މަގާމުން ދުރުކޮށްފަ އެވެ.
ޝަމާހް މަގާމުން ވަކިކުރި އިރު އޭނާ ކަމަށް ބުނާ މީހެއްގެ އޯޑިއޯއެއްވެސް ސޯޝަލް މީޑިއާގައި ވަނީ ލީކު ކޮށްލާފަ އެވެ. އެ އޯޑިއޯ އިން ދެތިން މީހެެއްގެ އަޑު އިވޭއިރު އޭގެ ތެރެއިން އެކަކީ ޝަމާހު ކަމަށް ބެލެވެ އެވެ.
އޯޑިއޯގައި ޝަމާހު ކަމަށް ބެލެވޭ މީހާ ވަނީ ސްޓެލްކޯއިން ވައްކަން ކޮށްފައިވާނެ ކަމަށާއި، އޭނާ ކުރި ކަންކަން އެނގޭނަމަ ސަރުކާރުން "ނޯށުން ރޯނެ" ކަމަށް ބުނެފަ އެވެ. އަދި "ސްޓެލްކޯގައި މަގޭ ކުޅިވަރު" އެނގޭނީ އަޒްހަދާއި ސާއިދަށް ކަމަށްވެސް އޭނާ ބުނެ އެވެ. މީގެ އިތުރުން، މިފްކޯގެ ކޮރަޕްޝަނަށް ވުރެ މާ ގިނައިން ސްޓެލްކޯގެ ތެރެއިން ފައިސާ ހޯދާ ކަމަށް ވެސް އެ އޯޑިއޯގައި ބުނެފައިވެ އެވެ.
ސްޓެލްކޯގެ މެނޭޖިން ޑިރެކްޓަރުގެ މަގާމަށް ޝަމާހް އައްޔަނުކުރީ މިދިޔަ ސެޕްޓެމްބަރު މަހު އެވެ. އެހެންކަމުން އޭނާ މަގާމުގައި ހޭދަވެފައިވަނީ 4 މަހެވެ.
ސްޓެލްކޯގެ މެނޭޖިން ޑިރެކްޓަރު ޝަމާހް އައްޔަނުކުރީ ކުރިން އެމަގާމުގައި ހުންނެވި ހުސައިން ފަހުމީ ވަކިކުރުމަށްފަހުގަ އެވެ. ސްޓެލްކޯގެ މެނޭޖިން ޑިރެކްޓަރު ކަމުގެ މަގާމަށް އައްޔަންކުރުމުގެ ކުރިން ޝަމާހް ވަނީ މިފްކޯގެ ސީއީއޯގެ މަގާމުވެސް އަދާކޮށްފައެވެ. 2024 ވަނަ އަހަރުގެ މޭމަހުގެ ތެރޭގައި އޭނާ މަގާމުން ވަކިކުރިއިރު އޭނާ ވަނީ އޭގެ ކުރިން މަގާމުގެ މަސްއޫލިއްޔަތުތަކުން އެކަހެރިކޮށްފަ އެވެ.
