މިއަހަރުގެ އޭޕްރީލް މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވޯޓުލާ މީހުންގެ ލިސްޓަށް މިހާތަނަށް 128 ޝަކުވާއެއް ލިބިފައިވާ ކަމަށް އިލެކްޝަންސް ކޮމިޝަނުން ހާމަކޮށްފި އެވެ.
އިލެކްޝަންސް ކޮމިޝަނުން މިހާރު ވަނީ އޭޕްރީލް 4 ވަނަ ދުވަހު ބޭއްވުމަށް ތައްޔާރުވަމުންދާ މި އިންތިހާބުގައި ވޯޓުލުމުގެ ހައްގު ލިބިފައިވާ މީހުންގެ ލިސްޓު އާންމުކޮށް، އެ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލާފަ އެވެ. އާންމުކޮށްފައިވާ ތަފާސް ހިސާބުތަކަށް ބަލާއިރު، މި އިންތިހާބުގައި ޖުމްލަ 294,937 މީހުންނަށް ވޯޓުލުމުގެ ހައްޤު ލިބިގެންވެ އެވެ. މީގެ ތެރޭގައި ހިމެނެނީ 144,527 އަންހެނުންނާއި 150,410 ފިރިހެނުންނެވެ.
މި ލިސްޓަށް ޝަކުވާ ހުށަހެޅުމުގެ ފުރުސަތު މިމަހުގެ 18 ވަނަ ދުވަހުގެ މެންދުރުފަހު 15:00 އާ ހަމައަށް ހުޅުވާލާފައިވާއިރު. އިލެކްޝަންސް ކޮމިޝަނުން ބުނީ މިހާތަނަށް ލިބިފައިވާ ޝަކުވާތަކުގެ ތެރޭގައި ގިނައީ ނިޔާވެފައިވާ މީހުންގެ މައުލޫމާތު ލިސްޓުގައި ހުރުމާއި، އެޑްރެހާ ގުޅޭ މައްސަލަތައް ކަމަށެވެ.
އެގޮތުން ލިސްޓަށް މީހަކު އިތުރުކުރުމަށް، އުނިކުރުމަށް ނުވަތަ މައުލޫމާތަށް ބަދަލު ގެނައުމަށް ހުށަހަޅާއިރު، އެކަން ސާބިތުކޮށްދޭ ރަސްމީ ލިޔުމެއް ހުށަހަޅަންޖެހެ އެވެ. އެގޮތުން އައިޑީ ކާޑުގެ ކޮޕީ، ރަށްވެހިކަމުގެ ލިޔުން، ގޭގެ ރަޖިސްޓްރީ ނުވަތަ ސަރުކާރުގެ އިދާރާއަކުން ދޫކޮށްފައިވާ ރަސްމީ ލިޔުމެއް ހުށަހެޅިދާނެ އެވެ.
ވޯޓާސް ލިސްޓު މިހާރު އިލެކްޝަންސް ކޮމިޝަނުގެ ވެބްސައިޓުންނާއި ސަރުކާރުގެ ގެޒެޓުން ފެންނަން ހުންނާނެ އެވެ. އަދި އަތޮޅުތެރޭގެ ރަށްރަށުގެ ކައުންސިލް އިދާރާތަކުގައިވެސް ލިސްޓު ވަނީ އާންމުކޮށްފަ އެވެ. މީގެ އިތުރުން 1414 އަށް 'VR (space) ID Number' ޖެއްސެވުމަށްފަހު އެސްއެމްއެސް ކޮށްގެންވެސް ވޯޓުލާން ރަޖިސްޓްރީވެފައިވާ ތަން ބަލާލެވޭ އިރު، ސިޔާސީ ޕާޓީތަކަށް ޝަކުވާ ހުށަހެޅުމަށް ހަމަޖެހިފައިވަނީ ހާއްސަ 'ސިމެދަ ޕޯޓަލް' މެދުވެރިކޮށް ޝަކުވާ ހުށަހެޅޭނެކަމަށް އެ ކޮމިޝަނުން ބުނެ އެވެ.
