ވެނެޒުއެލާގެ ތެޔޮ ޝިޕްމަންޓްތަކަށް ދަތިކުރުމުގެ ފިޔަވަޅު އެޅުމުގެ ގޮތުން އެ ޤައުމުގެ އިތުރު ތެޔޮ ޓޭންކަރަކަށް އެމެރިކާއިން އަރައިފިއެވެ. މިއާއި އެކު، މިއީ އެމެރިކާއިން ހިފެހެއްޓި ވެނެޒުއެލާގެ ފަސްވަނަ ތެޔޮ ޓޭންކަރު ކަމަށް ހޯމްލޭންޑް ސެކިއުރިޓީ ސެކްރެޓަރީ ކްރިސްޓީ ނޯއެމް ވިދާޅުވެއްޖެއެވެ.
ނޯއެމް ވިދާޅުވީ އެމެރިކާގެ ކޯސްޓްގާޑުން ކެރީބިއަން ކަނޑުގެ އިރުމަތީގައި އޮންނަ ބައިނަލްއަގްވާމީ ކަނޑުގެ ސަރަހައްދުން “އޮލީނާ” ނަމަކަށް ކިޔާ ޓޭންކަރު ހުއްޓުވީ އެމެރިކާގެ ކޯސްޓުގާޑަށް ފިލަން އުޅެނިކޮށް ކަމަށެވެ. މި އޮޕަރޭޝަންގައި ޑިޕާޓްމަންޓް އޮފް ޑިފެންސް، ސްޓޭޓް ޑިޕާޓްމަންޓް އަދި ޖަސްޓިސް ޑިޕާޓްމަންޓް ހިމެނޭ ގޮތަށް ފެޑެރަލް އެތައް އިދާރާތަކެއް ބައިވެރިވެފައިވާ ކަމަށް އެމެރިކާ އިން ބުނެއެވެ.
"އޮލީނާ އަކީ ދަތިކުރުމުގެ ފިޔަވަޅު އަޅާފައިވާ ތެޔޮ ގެންގުޅޭ ކަމަށް ޝައްކު ކުރެވޭ ފްލީޓް ޓޭންކަރެއް،.. ބައިނަލްއަގްވާމީ ގާނޫނުތަކުން ހުއްދަކުރާ ކޮންމެ ތަނަކަށް ވިޔަސް ގަވާއިދާ ހިލާފަށް ތެލުގެ ވިޔަފާރި ކުރާ އުޅަނދުތަކަށް އަހަރެމެން އަމާޒުކުރާނަން” ނޯއެމް ވިދާޅުވިއެވެ.
އޮލިނާ އަކީ ފަހަކަށް އައިސް ސިލްސިލާކޮށް އެމެރިކާއިން ޖައްސަމުންދާ އޮޕަރޭޝަނުގައި ހުއްޓުވި ވެނެޒުއެލާގެ ފަސްވަނަ ތެޔޮޓޭންކަރެވެ. މީގެ ކުރިން އެމެރިކާ އިން ބަނީ ވެނެޒުއެލާގެ ސާފު ނުކުރާ ތެޔޮ ހިފައިގެން ދަތުރުކުރި ސްކިޕަރ، ސެންޗަރީސް، މެރިނޭރާ އަދި އެމް ސޯފިއާ ހުއްޓުވާފައެވެ. މެރިނޭރާ އަކީ ފަހުން ރަޝިޔާއިން ޙިމާޔަތް ދީފައިވާ ކުރީގެ މަޝްހޫރު ބެލާ1 އެވެ.
އެމެރިކާ އިން ބުނަނީ މި ޓޭންކަރުތައް ގިނަ ފަހަރަށް އޮޕަރޭޓް ކުރަނީ ވަގު ދިދައިގައި ޓްރެކިން ޑޭޓާއަށް ބަދަލު ގެނެސްގެންނެވެ.
