ތެލޫގޫ ސިނަމާގެ މަޝްހޫރު ދެ ތަރިން ކަމަށްވާ ވިޖޭ ދެވަރަކޮންޑާ އާއި ރަޝްމިކާ މަންދަންނާ މިއަހަރުގެ ފެބްރުއަރީ މަހު ކައިވެނިކުރަން ތައްޔާރުވަމުންދާ ކަމަށް ރިޕޯޓްތައް ބުނެފި އެވެ.
އިންޑިއާގެ ނޫހެއް ކަމަށްވާ ހިންދުސްތާން ޓައިމްސްއިން އެ ދެ ތަރިންގެ ގާތް މީހަކާ ހަވާލާދީ ރިޕޯޓްކޮށްފައިވާ ގޮތުގައި ކައިވެނީގެ ހަފުލާ ބޭއްވުމަށް ހަމަޖެހިފައިވަނީ ފެބްރުއަރީ މަހުގެ 26 ވަނަ ދުވަހު އެވެ. މި ކައިވެނީގެ ހަފުލާ ބޭއްވުމަށް ނިންމާފައިވަނީ އިންޑިއާގެ އުދެއިޕޫރުގަ އެވެ.
މިއީ "ޑެސްޓިނޭޝަން ވެޑިން" އެއްގެ ގޮތުގައި ކުރިއަށް ގެންދާ ހަފުލާއެއް ކަމަށާއި، މިހާރު ހަފުލާ ބާއްވާނެ ތަނާއި އެހެނިހެން އިންތިޒާމުތައް ފައިނަލްކޮށް ނިމިފައިވާ ކަމަށް އެ ނޫހުން ރިޕޯޓްކުރެ އެވެ. އަދި މި ހަފުލާގައި ބައިވެރިވާނީ ދެ ފަރާތުގެ އާއިލާގެ މެންބަރުންނާއި ގާތް ރައްޓެހިން އެކަނި ކަމަށްވެސް މައުލޫމާތު ލިބެ އެވެ.
ރިޕޯޓުތައް ބުނާގޮތުން ކައިވެނީގެ ކުރިން މިދިޔަ އޮކްޓޯބަރު މަހުގެ ތެރޭގައި ވިޖޭ އާއި ރަޝްމިކާ ވަނީ ސިއްރިއްޔާތުގައި އެންގޭޖުވެފަ އެވެ.
މި ދެ ތަރިން ލޯބީގެ ގޮތުން ގުޅިގެން އުޅޭ ކަމުގެ އަޑުތައް ފުރަތަމަ ފެތުރެން ފެށީ 2018 ވަނަ އަހަރު އެ ދެމީހުން އެކުގައި ކުޅުނު ފިލްމު "ގީތާ ގޮވިންދަމް" ގެ ދުވަސްވަރު އެވެ. އޭގެ ފަހުން 2019 ވަނަ އަހަރު ނުކުތް "ޑިއާ ކޮމްރޭޑް" ގެ މަސައްކަތުގެ ތެރެއިންވެސް މި ވާހަކަތައް ވަރަށް ގަދައަށް ދެކެވުނެވެ.
ވިޖޭ އާއި ރަޝްމިކާ އެކުގައި ތިން ފިލްމެއްގައި މަސައްކަތް ކޮށްފައިވާއިރު، އެކި ތަންތަނުން މި ދެ ތަރިން އެކުގައި ފެނިފައިވެ އެވެ. އެގޮތުން 2022 ވަނަ އަހަރުގެ އޮކްޓޯބަރު މަހު ޗުއްޓީ ހޭދަކުރުމަށް މި ދެ ތަރިން ވަނީ ރާއްޖެއަށް ވެސް އައިސްފަ އެވެ.
ވިޖޭ އާއި ރަޝްމިކާ އަކީ މިހާރު ބޮލީވުޑްގައިވެސް ފައިތިލަ ސާބިތުކޮށްފައިވާ ދެ ތަރިންނެވެ. ވިޖޭ ވަނީ "ލައިގާ" އިން ބޮލީވުޑަށް ތައާރަފުވެފައެވެ. އަދި ރަޝްމިކާ ވަނީ މި ފަހުން ނުކުތް ކާމިޔާބު ފިލްމު "އެނިމަލް" އާއި މި އަހަރު ނުކުތް "ޗާވާ" ގައި މުހިންމު ރޯލުތަކެއް އަދާކޮށްފަ އެވެ.
