ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބަށް ކުރިމަތިލުމަށް އެދޭ ކެނޑިޑޭޓުން ފޯމު ހުށަހަޅާ "މައި ޕޯޓަލް" މިއަދު ހުޅުވާލައިފި އެވެ.

އިލެކްޝަންސް ކޮމިޝަނުން ބުނީ ކުރިއަށްއޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބަށް ކުރިމަތިލުމަށް އެދޭ ފަރާތްތަކުގެ މައުލޫމާތު ފުރިހަމަކޮށް ލިޔެކިޔުންތައް އަޕްލޯޑުކުރުމަށްފަހު ފައިސާ ދެއްކުމަށްޓަކައި އިދާރީގޮތުން މައި ޕޯޓަލް މިހާރު ހުޅުވާލާފައިވާ ކަމަށެވެ. މިހާރު ޕޯޓަލް ހުޅުވާލިނަމަވެސް، އިންތިހާބަށް ކުރިމަތިލުމަށް އެދޭ ފަރާތްތަކަށް ފޯމު ލެވޭނީ އިންތިހާބަށް ރަސްމީކޮށް އެ ކޮމިޝަނުން އިއުލާނުކުރުމުން ކަމަށް އީސީން ބުންޏެވެ.

އީސީން ބުނީ ދުރާލާ ޕޯޓަލް ހުޅުވުމުގެ ބޭނުމަކީ، އިންތިހާބަށް ކުރިމަތިލުމަށް އެދޭ ފަރާތްތަކަށް ލުއިފަސޭހަ އިންތިޒާމުތަކެއް ހަމަޖައްސައިދީ، އިންތިހާބަށް ރަސްމީކޮށް އިއުލާނު ކުރުމާއެކު ފޯމު ހުށަހެޅޭނެ ފުރުސަތު ފަހިކޮށްދިނުން ކަމަށެވެ.

އެގޮތުން މިއަދުން ފެށިގެން އިންތިހާބަށް ކުރިމަތިލުމަށް އެދޭ ފަރާތްތަކުން އެފަރާތްތަކުގެ އަމިއްލަ އީފާސް އެކައުންޓް މެދުވެރިކޮށް، މައި ޕޯޓަލް އަށް ލޮގިންވުމަށްފަހު ޕޯޓަލްގައި ކެންޑިޑޭޓުގެ މައުލޫމާތާއި، އަޕްލޯޑުކުރަންޖެހޭ ލިޔެކިޔުންތައް އަޕްލޯޑުކުރުމަށްފަހު، އިންތިހާބަށް ދައްކަންޖެހޭ އިދާރީ ފައިސާދެއްކޭނެކަމަށް އެ ކޮމިޝަނުން ބުންޏެވެ.

އަދި އެހެން އަހަރުތަކާ ހިލާފަށް މިއަހަރު ދާއިރާތަކަށް ވާދަކުރާ ކެންޑިޑޭޓުން، ދާއިރާއަށް ވޯޓުލުމުގެ ހައްގު ލިބިފައިވާ 50 މީހުންގެ ތާއިދުވެސް ހޯދަންވާނީ މައި ޕޯޓަލް މެދުވެރިކޮށް ކަމަށް އީސީން ވަނީ ބުނެފައެވެ.

މީގެއިތުރުން، އިންތިހާބަށް ކުރިމަތިލުމަށް އެދޭ ފަރާތްތަކުގެ ކުށާއި ދަރަނީގެ ރިކޯޑު އަޕްލޯޑުކުރާއިރު އީސީން ކޮށްފައިވާ އިއުލާނާ އެއްގޮތަށް އަމަލުކުރުމަށާއި އިންތިހާބަށް ރަސްމީކޮށް އިއުލާނު ކުރަންވާއިރަށް، ކެންޑިޑޭޓުންގެ މައުލޫމާތު ފުރިހަމަކޮށް، ލިޔެކިޔުންތައް އަޕްލޯޑުކުރުމަށްފަހު އިދާރީ ފައިސާ ދައްކައި ތައްޔާރުވެގެން ތިބުމަށް އީސީން ވަނީ އެދިފަ އެވެ.