ފިންލޭންޑާއި އެސްޓޯނިއާ އާއި ގުޅުވައިދޭ ކަނޑުއަޑީގައިވާ މުވާސަލާތީ ކޭބަލް ހަލާކު ކޮށްލައިފިއެވެ. މި މައްސަލައިގައި ރަޝިޔާ އާއި ގުޅުން އޮންނަ މުދާ އުފުލާ އުޅަނދެއް މިހާރު ވަނީ އަތުލައިގަނެފައެވެ.
ފިންލޭންޑާއި އެސްޓޯނިއާގެ ހަބަރުތައް ބުނާ ގޮތުގައި ފިޓްބާގް ނަމަކަށް ކިޔާ އެ އުޅަނދުން ކޭބަލް ހަލާކުކޮށްލީ ނަގިއްޔެއް އަޅުވައިގެން ކަމަށާއި، އެ މައްސަލައާއި ގުޅިގެން 14 ފަޅުވެރިންނާއެކު އެ ބޯޓު ވަނީ ހިފަހައްޓާފައި ކަމަށް ވެސް ޚަބަރުތައް ބުނެއެވެ.
ރަޝިޔާގެ ސެއިންޓް ޕީޓާސްބާގުން އިސްރާއީލުގެ ހައިފާއަށް ދަތުރުކުރަމުން ދިޔަ 132 މީޓަރުގެ މި މުދާ އުފުލާ ބޯޓުގައި ތިބި މީހުންގެ ތެރެއިން ރަޝިޔާގެ ރައްޔިތެއް ހިމެނޭ ގޮތަށް ތިން ފަޅުވެރިން މިހާރު ވަނީ ޖައްޔަރުކޮށް ދަތުރުކުރުން ވެސް މަނާ ކޮށްފައެވެ. އެ ބޯޓުގެ 14 ފަޅުވެރިންނަކީ ރަޝިޔާ، ޖޯޖިއާ، އަޒަރުބައިޖާން، އަދި ކަޒަކިސްތާނުގެ ފަޅުވެރިންނެވެ.
Advertisement
ހަލާކުވޮ ކޭބަލަކީ ފިންލޭންޑްގެ ޓެލެކޮމް ކުންފުނި އެލިސާ ގެ ކޭބަލެކެވެ. ހަލާކުވެފައިވާ ބައި އޮތީ އެސްޓޯނިއާގެ އެކްސްކްލޫސިވް އިކޮނޮމިކް ޒޯން ގެ ތެރޭގައެވެ.
2022 ވަނަ އަހަރު ރަޝިޔާއިން ޔޫކްރޭނަށް އަރައިގަތް ފަހުން ބޯލްޓިކް ކަނޑުގެ އަޑީގައިވާ ކޭބަލްތަކާއި ހޮޅިތަކަށް ގެއްލުންދޭ ކަމުގެ މައްސަލަތައް ދޭތެރެދޭތެރެއިން ފެންމަތި ވެއެވެ.
