ފަތުރުވެރިން ގެއްލުން؛ އެންމެންގެ ހަށިގަނޑުތައް ނަގައި ނިމިއްޖެ



^{ވ.އަތޮޅުގެ ހޮހަޅައާއި ބެހޭ މަޢުލޫމާތު ބަޔާންކޮށްފައިވާ ޗާޓެއް: ގެއްލުނު އެންމެންގެ ހަށިގަނޑުތައް ނަގައި ނިމުނީ މިއަދު.}

ޑައިވިނަށް ގޮސް އުޅެނިކޮށް މަރުވި އިޓަލީގެ ހުރިހާ ޑައިވަރުންގެ ހަށިގަނޑުތައް ނަގައި މިއަދު ނިމިއްޖެއެވެ. 

އެމީހުންގެ ހަށިގަނޑުތައް ހޯދުމުގައި ދިމާވި އެންމެ ބޮޑު ގޮންޖެހުމަކީ އެތަނުގެ ފުންމިނާއި އޮއިވަރު އަދި އެތަން ހުރި ގޮތުގެ ސަބަބުންނެވެ.

ވ. އަތޮޅު އަލިމަތާ ކައިރިއަށް ޑައިވިނަށް ގޮސް އުޅެނިކޮށް އިޓަލީއަށް ނިސްބަތްވާ ޖުމްލަ ފަސް ފަތުރުވެރިން ބެއްލުނެވެ. އެއި މިމަހުގެ 14 ވީ ބުރާސްފަތި ދުވަހުހައެވެ. އެ މީހުންގެ ހަބަރެއް ނުވެގެން ފުލުހުންނަށާއި ސިފައިންނަށް ރިޕޯޓުލިބުނީ އެ ދުވަހުގެ މެންދުރުފަހު 13:45 ހާއިރެވެ.

ފަސް މީހުންގެ ތެރެއިން އެކަކު ފެނިފައިވަނީ އެ ދުވަހުގެ އިރުއޮއްސި 18:13 ހާއިރު އެވެ. އޭނާ ފެނިފައިވަނީ ގާތްގަނޑަކަށް 60 މީޓަރު އަޑިން ހޮހަޅައިގެ ތެރެއިންނެވެ.

ހުކުރު ދުވަހާއި ހޮނިހިރު ދުވަހު ދިވެހި ސިފައިންގެ ޑައިވް ޓީމުން އެ ސަރަހައްދުގައި ރިކަވަރީ އޮޕަރޭޝަންތައް ކުރިއަށް ގެންގޮސްފައިވީނަމަވެސް ހޮނިހިރު ދުވަހުގެ މެންދުރުފަހު ސާޖަންޓް ފަސްޓް ކްލާސް މުޙައްމަދު މަހުދީ ނިޔާވުމާއެކު އިތުރަށް އޮޕަރޭޝަން ކުރިއަށް ނުގެންގޮސް މެދުކަނޑައިލީ އެވެ.

މި އޮޕަރޭޝަން އަލުން ފެށީ ދިވެހި ސަރުކާރާއި އިޓަލީ ސަރުކާރާއި ދެމެދު މަޝްވަރާތައް ކުރުމަށް ފަހު، ރާއްޖެ އަށް ފިންލޭންޑުގެ ތިން ތަޖުރިބާކާރުން އައިސް، އެމްއެންޑީއެފްގެ ބެލުމުގެ ދަށުންނެވެ.

މި ހާދިސާއާ ގުޅިގެން އިޓަލީ ސަރުކާރުން އަންނަނީ ޖިނާއީ ތަހުގީގެއް ހިންގަމުންނެވެ.