ވެނެޒުއެލާއަކީ ބިމުއަޑީގެ ޤުދުރަތީ ވަޞީލަތުގެ ގޮތުން ދުނިޔޭގެ އެންމެ ބޮޑު މުއްސަނދިކަމެއް ލިބިފައިވާ ޤައުމެވެ. ތެލާއި ޤުދުރަތީ ގޭހާއި ރަނާއި ގިނަ ޢަދަދެއްގެ މައުދަންތަކުގެ ބޮޑު ރިޒާވްތަކެއް ވެނެޒުއޭލާގައި އެބަހުއްޓެވެ.
ވެނެޒުއެލާގައިވ އެންމެ ބޮޑު މުއްސަނދިކަމަކީ ތެލެވެ. ދުނިޔޭގައިވާ އެންމެ ބޮޑު ތެލުގެ ރިޒާވް އޮތީ އެ ޤައުމުގައެވެ. އެއީ ގާތްގަނޑަކަށް 303.2 ބިލިއަން ފީފާއެވެ. ހުސްވި 2025 ވަނަ އަހަރު ވެނެޒުއެލާއިން ކޮންމެ ދުވަހަކު 1 މިލިއަން ފީފާގެ ތެޔޮ އުފެއްދިއެވެ. ތެޔޮ އެކްސްޕޯޓް ކޮށްގެން އެކަނި އޭގެ ކުރީ އަހަރު ގާތްގަނޑަކަށް 17.5 ބިލިއަން އެމެރިކާ ޑޮލަރު ގެ ޢާމްދަނީއެއް ވެނެޒުއެލާއިން ހޯދިއެވެ.
މި ޗާޓަކީ ދުނިޔޭގައިވާ އެންމެ ބޮޑު ތެލުގެ ރިޒާވް ތަކެވެ. އެއްވަނައިގައިވާ ވެނެޒުއެލާގައި 303 ބިލިއަން ފީފާގެ ތެޔޮ އެބަހުއްޓެވެ. / ސޯސް: އޯޕެކް
Advertisement
ޤުދުރަތީ ގޭހުގައި ވެސް ދުނިޔޭގެ އަށްވަނައަށް އެންމެ ބޮޑު ރިޒާވް އޮތީ ވެނެޒުއެލާގައެވެ. އެއީ ގާތްގަނޑަކަށް 201 ޓްރިލިއަން ކިއުބިކް ފީޓް (ޓީސީއެފް)އެވެ.
ވެނެޒުއެލާގެ ބިމު އަޑީގައި 8900 ޓަނަށް ވުރެ ގިނަ ރަނުގެ ރިޒާވް އެއް ވެސް އެބަހުރިނކަމަށް ވެއެވެ. ލެޓިން އެމެރިކާގެ ޤައުމުތަކުގެތެރެއިން އެންމެ ގިނަ ޢަދަދަކަށް ރަން އެއްކޮށްފައި ހުރީ ވެސް ވެނެޒުއެލާގައެވެ. 2022 ގެ ޑޭޓަތަކުން އެނގޭ ގޮތުގައި ވެނެޒުއެލާގެ ސެންޓްރަލް ބޭންކުގައި 161.0 ޓަނަށް ވުރެ ގިނައިން ރަން އެބަހުއްޓެވެ. ބިމު އަޑީގައި ހުރި 8900 ޓަނުގެ ރިޒާވް ނުހިމަނައެވެ.
ލެޓިން އެމެރިކާގެ ޤައުމުތަކުން އެއްކޮށްފައިވާ ރަނުގެ ޓަނޭޖް ދައްކުވައިދޭ ބާޗާޓެއް (ސޯސް: ޓްރޭޑިން އިކޮނޮމިކްސް / 2022 ސެޕްޓެންބަރު)
މީގެ އިތުރުން ދަގަނޑާއި ލޮއިން ފެށިގެން އިލެކްޓްރޯނިކްސް އަދި ޒަމާނީ ޓެކްނޮލޮޖީތަކުގައި ބޭނުންކުރާ އެތައް ބައިވަރު މަޢުދަންތަކާއި ޖަވާހިރު ވެސް އެ ޤައުމުގެ ބިމުގައި އެބަހުއްޓެވެ. އޭގެތެރޭގައި ޑައިމަންޑް، ޓައިޓޭނިއަމް، ޒިންކް، އަދި ކޯލް ވެސް ހިމެނެއެވެ. ދުނިޔޭގައި 8 ވަނަ އަށް އެންމެ ބޮޑު ދަގަނޑުގެ ރިޒާވް ހުރީ ވެސް ވެނެޒުއެލާގައެވެ.
މަޢުދަނުގެ މުއްސަނދިކަމާއި އެއްވަރަށް ވެނެޒުއެލާ އަކީ އާދަޔާއި ޚިލާފު ޤުދުރަތީ މާހައުލެއްގެ ގޮތުގައި ވެސް މަޝްހޫރު ޤައުމެކެވެ. ދުނިޔޭގެ “މެގަޑައިވަރސް” ޤައުމުތަކުގެ ތެރޭގައި އެ ޤައުމު ވަނީ ލިސްޓު ކޮށްފައެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ ވެނެޒުއެލާގެ ތެލުގެ މުއްސަނދިކަން މީގެފަހުން މެނޭޖް ކުރާނީ އެމެރިކާއިންނެވެ.
ތެލާއި، ރަނާއި، ގޭހާއި ދަގަނޑާއި އަދިވެސް އެތައް ޤުދުރަތީ މަޢުދަނަކުން މުއްސަނދިވެފައިވާ ވެނެޒުއެލާގެ މި މުއްސަނދިކަން ދެން ކޮންޓްރޯލް ކުރާނީ އެމެރިކާ އިން ކަމަށް ރައީސް ޓްރަމްޕް ވިދާޅުވިއެވެ.
