ރަސްމާލެ ބިން ހިއްކުމުގެ މަޝްރޫއުގެ ދަށުން 41 ހެކްޓަރުގެ ބިން ހިއްކައި ނިންމައިފި އެވެ.

ރަސްމާލެ ހިއްކުމުގެ މަޝްރޫއު ކުރިއަށްގެންދާ ކުންފުނި ކަމަށްވާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މީޑިއާތަކަށް މިއަދު ފޮނުވި މެސެޖެއްގައި ބުނީ، ރަސްމާލެ ހިއްކުމުގެ ދަށުން 41 ހެކްޓަރުގެ ބިން މިހާތަނަށް ހިއްކިފައިވާ ކަމަށާއި، އެއީ މަޝްރޫއުގެ ޖުމްލަ 30 އިންސައްތަ ކަމަށެވެ.

ރަސްމާލެ ސައިޓް އޭ ގައި ހިއްކުމަށް ހަމަޖެހިފައިވަނީ ޖުމްލަ 137.5 ހެކްޓަރުގެ ބިމެވެ.

ރަސްމާލޭ ސައިޓް އޭ ގައި ބިން ހިއްކުމުގެ މަސައްކަތް ކުރިއަށް ގެންދަނީ ދުނިޔޭގެ އެންމެ ބޮޑު އެއް ޓްރެއިލާ ސަކްޝަން ހޮޕާ ޑްރެޖަރުގެ ތެރޭގައި ހިމެނޭ، 46,000 ކިއުބިކް މީޓަރުގެ ކެޕޭސިޓީ 'ކްރިސްޓޯބަލް ކޮލޯން' ބޭނުންކޮށްގެން ކަމަށާއި މި ޑްރެޖަރު އޮޕަރޭޓް ކުރަނީ ޖޭން ޑެ ނަލް ނަމަކަށް ކިޔާ ކުންފުނިން ކަމަށް އެމްއޭސީއެލް އިން ވަނީ ބުނެފަ އެވެ.

އެމްއޭސީއެލް އިން ރަސްމާލެ ސައިޓް އޭ ހިއްކުމުގެ މަސައްކަތް ފަށާފައިވަނީ މިމަހުގެ ފުރުތަމަ ދުވަހު އެވެ. ރަސްމާލެ ހިއްކުމުގެ އިތުރުން އެމްއޭސީއެލް އިން އަންނަނީ ހުޅުމާލޭ ތިން ވަނަ ފިޔަވަހި ހިއްކުމުގެ މަސައްކަތް ކުރަމުންނެވެ. ހުޅުމާލެ ތިން ވަނަ ފިޔަވަހީގެ ބިން ހިއްކުމުގެ މަޝްރޫއުގެ ދަށުން މިހާތަނަށް 40 ހެކްޓަރުގެ ބިން ވަނީ ހިއްކައި ނިމިފަ އެވެ.