މެކްސިކޯގައާއި ދުނިޔޭގެ އެތަންމިތަނުގައި ޖަރީމާތައް ހިންގަމުންދިޔަ މާފިޔާ 55 ލީޑަރަކު މެކްސިކޯ ސަރުކާރުން އެމެރިކާ އާއި ޙަވާލު ކޮށްފިއެވެ. މި މީހުން އެމެރިކާ އާއި ޙަވާލުކޮށްފައި ވަނީ ވަކިވަކިން ހިންގި އަސްކަރީ ދެއޮޕަރޭޝަނެއްގައި ވަރަށް ސިއްރިޔާތުގައެވެ.

ސަލާމަތީ މަސްދަރުތަކުން ބުނާ ގޮތުގައި މި އަހަރުގެ ކުރީކޮޅު މިދެންނެވި ހައްދުފަހަނައަޅާފައިވާ ކުށްވެރިންތައް އެމެރިކާ އަށް ގެންދިޔައީ އެމީހުން ގެންދާ ތަން އެ މީހުނަށް ވެސް ނާންގައި، އޮޅުވާލައިގެންނެވެ. މި މީހުންނަކީ އެމެރިކާ އަށް އެތައް ސަތޭކަ ޑުރަގު ޝިޕްމެންޓެއް ފޮނުވާފައިވާ އަދި އެމެރިކާގެ ޤާނޫނުން އެމީހުންނަށް އަދަބު ލިބެން ޖެހޭ ބަޔަކަށް ވާއިރު، މެކްސިކޯގެ ޤާނޫނުން ވެސް އެ މީހުން އެމެރިކާ އާއި ޙަވާލުކުމުގެ ހުރަހެއް ނެތް ބައެކެވެ. ރިޕޯޓުތައް ބުނާ ގޮތުގައި އެ މީހުން މިހާރު ތިބީ “މެކްސިމަމް” ސެކިއުރިޓީ ފެޑެރަލް ޖަލުތަކުގައެވެ.

މެކްސިކޯ އިން އެމެރިކާ އާއި ހަވާލުކުރި ކުށްވެރިންގެ ތެރޭގައި ސިނަލޯއާ ކާޓޭލް، ޖަލިސްކޯ ނިއު ޖެނެރޭޝަން ކާޓެލް (ސީޖޭއެންޖީ)، އަދި ލޮސް ޒެޓާސް ފަދަ ބޮޑެތި ޖަރީމާ ހިންގުމުގައި ހައްދުންނައްޓާފައިވާ ކަމަށް ލޭބަލް ކުރެވިފައިވާ ކާޓެލް ހިންގާ މީހުން ހިމެނެއެވެ.

ނުރަސްމީ މަސްދަރަކުން ބުނާ ގޮތުގައި ސީޖޭއެންޖީގެ އެންމެ އިސް މީހާ ވެސް ހައްޔަރުކުރަން އެމެރިކާ އިން ދަނީ މަސައްކަތް ކުރަމުންނެވެ. އޭނާ ހުރި ތަން ބުނެދިން މީހަކަށް 15 މިލިއަން ޑޮލަރު ވަނީ ހުށަހަޅަފައެވެ. އެއީ އެލް މެންޗޯއެވެ. އޭނާ އަކީ 1992 ވަނަ އަހަރު މަގުމަތީގައި ހެރޮއިން ވިއްކަން އުޅުނު، ނަމަބެސް މިހާރު “ބޮސް”އެވެ.

މި މީހުންނަކީ ހަތިޔާރު ގެންގުޅުމާއި، ވިއްކުމާއި، ހަތިޔާރު ސުމަގްލް ކުރުމާއި، ކޮންޓްރެކްޓަށް މީހުން މަރައި ގެއްލުވައިލުމާއި، މަނީ ލޯންޑާކުރުމާއި ސައިބާ ކްރައިމްތަކާއި، މަސްތުވާތަކެތީގެ ވަގު ވިޔަފާރީން ފެށިގެން ގޮސް ނުބައިވެގެންވާ އެތައް ޖަރީމާތައް ހިންގާ ކަމަށް ލޭބަލް ކުރެވިފައިވާ ބޮޑެތި މުޖުރިމުންނެވެ. އޭގެ ތެރޭގައި 1985 ވަނަ އަހަރު އެމެރިކާގެ ޑީއީއޭގެ އެޖެންޓް އެންރިކޭ “ކިކީ” ކެމަރޭނާ މަރައިލުމުގެ ފަހަތުގައިވާ ކަމަށް ތުހުމަތު ކުރެވޭ ރަފައެލް ކާރޯ ކުއިންޓެރޯ އާއި މެކްސިކޯގެ ޖަލުތަކުގެ އެތެރެއިން ޖިނާއީ ނެޓްވޯކްތައް ހިންގަމުން ދިޔަ ކަމަށް ބުނާ ޒެޓާސްގެ ބޮސް ވެސް ހިމެނެއެވެ.

މި ދެންނެވި މާފިޔާ މީހުން އެމެރިކާ އާއި ޙަވާލު ނުކޮށްފިނަމަ މެކްސިކޯ އަށް އަދަބު ދޭނެ ކަމުގެ އިންޒާރު ވޮޝިންޓަނުން ވަނީ ދީފައިކަން ފާހަގަ ކުރެވެއެވެ.