އއ. އުކުޅަހުން ގެއްލިގެން ހޯދަމުންދާ ރަޝިޔާއަށް ނިސްބަތްވާ ފަތުރުވެރިޔާ އަދިވެސް ނުފެންނަ ކަމަށާއި އޭނާ ހޯދުމުގެ މަސައްކަތް ކުރިއަށްދާ ކަމަށް އުކުޅަހު ކައުންސިލްގެ ރައީސް ޝައުކަތު އިބްރާހިމް ވިދާޅުވެއްޖެ އެވެ.
"ޚުލާސާ"އަށް މައުލޫމާތު ދެއްވަމުން ޝައުކަތު ވިދާޅުވީ، ގެއްލިގެން ހޯދަމުންދާ ފަތުރުވެރިޔާ އެންމެ ފަހުން ފެނިފައިވަނީ މި މަހުގެ 16 ވަނަ ދުވަހުގެ ހަވީރުގެ ވަގުތެއްގައި ކަމަށެވެ. އެ މީހާ ހޯދުމުގެ މަސައްކަތް ކައުންސިލާއި ރަށުގެ ރައްޔިތުން ގުޅިގެން އިއްޔެ ވެސް ކޮށްފައިވާ ކަމަށް ޝައުކަތު ވިދާޅުވި އެވެ.
އެގޮތުން ކައުންސިލާއި ރަށުގެ ރައްޔިތުން ނުކުމު ރަށުގެ ބޮޑުބައެއް ބަލާފައިވާނެ ކަމަށާއި މީގެ އިތުރުން މޫދާއި ފަޅު އަދި ރަށާއި ކައިރި އެހެން ރަށްރަށްވެސް ޑްރޯން އަރުވައިގެން ބަލާފައިވާނެ ކަމަށް އޭނާ ވިދާޅުވި އެވެ. އެހެން ނަމަވެސް މިހާތަނަށް ފަތުރުވެރިޔާ ފެނިފައިނުވާ ކަމަށް ޝައުކަތު ވިދާޅުވި އެވެ. ޝައުކަތު ވިދާޅުވި ގޮތުގައި އެ މީހާ ރަށުން ބޭރަށް ގޮސްފައިވާ ކަމުގެ އެއްވެސް މައުލޫމާތެއް ވެސް ކައުންސިލަށް ލިބިފައެއް ނުވެ އެވެ.
Advertisement
މިކަން، ކަމާ ގުޅުން ހުރި އިދާރާތަކަށް މިހާރު ހުށަހަޅާފައިވާނެ ކަމަށް ޝައުކަތު އިތުރަށް ވިދާޅުވި އެވެ.
ގެއްލިގެން ހޯދަމުންދާ ފަތުރުވެރިޔާއަކީ ޗުއްޓީ ހޭދަކޮށްލުމަށް އެކަނި ރާއްޖެ އައިސް އުޅޭ ފަތުރުވެރިއެކެވެ. އެ މީހާ ހުރީ އެ ރަށުގައި ހުންނަ "ލަ ޕަލްމާ ސޫޓްސް" ނަމަކަށް ކިޔާ ގެސްޓު ހައުސްއެއްގަ އެވެ. އުކުޅަހު ކައުންސިލުން ފޭސްބުކްގައި ހިއްސާކުރި ޕޯސްޓެއްގައި ބުނީ، ގެއްލުނު ފަތުރުވެރިޔާގެ ފޯނާއި އެހެނިހެން ބައެއް ތަކެތި އޭނާގެ ކޮޓަރީގައި ހުރި ކަމަށެވެ.
އުކުޅަހު ކައުންސިލުން އޭނާގެ ފޮޓޯއެއް އާންމުކޮށްފައިވީ ނަމަވެސް އޭނާއާ ބެހޭ އިތުރު އެއްވެސް މައުލޫމާތެއް ހާމަކޮށްފައެއް ނުވެ އެވެ.
އެހެން ނަމަވެސް އެ މީހާ ބެހޭ މައުލޫމާތެއް ލިބިފައިވާ ފަރާތެއްވާނަމަ "ލަ ޕަލްމާ ސޫޓްސް"ގެ ނަންބަރު 9646363 އަށް ނުވަތަ އުކުޅަހު ޕޮލިހުގެ ނަމްބަރު 9553510 އަށް ގުޅައި އޭނާއާ ބެހޭ މައުލޫމާތު ހިއްސާކުރުމަށް އުކުޅަހު ކައުންސިލުން ވަނީ އެދިފަ އެވެ.
