ޓްރަމްޕުގެ އިންޒާރަށް ފަހު ވެސް ޔުކްރޭނު ހަނގުރާމަ ނުނިމި ދިގުލައިގެން ދަނީއެވެ. ރަޝިޔާ އަށް ބިރު ދެއްކުމަށް އެމެރިކާ އިން ނިއުކްލިއާ ސަބްމެރީން ފޮނުވުމުން ވެސް ރަޝިޔާއިން ޔުކްރޭނުގައި އޮތް ފައުޖު ފަހަތަށް ނުޖެއްސިއެވެ. 

ޓްރަމްޕު ރަޝިޔާ އަށް ބިރު ދައްކަން މަސައްކަތް ކުރުމުން އޭގެ ރައްދުގައި ރަޝިޔާއިން ކަނޑުގައި ބޮޑު ސުނާމީ އެއް އުފައްދާލާނެ ކަމުގެ އިންޒާރު ވެސް ދިނެވެ. ކޮންމެޔަކަސް، ޓްރަމްޕަށް ޖެހުނީ ޕޫޓިން ރުއްސާށެވެ. މަޝްވަރާތައް ކުރިޔަށް ގެންދާށެވެ.

މި ޑިސެންބަރު މަހުގެ ދެވަނަ ދުވަހު ވެސް ޓްރަމްޕުގެ އެދުމަށް އޭނާގެ ޓިމު ވަނީ ރަޝިޔާއަށް ގޮސްފައެވެ. ފަސްގަޑިއިރުގެ އެ ބައްދަލުވުން ނިމުނީ ކޮޅެއްގައި ނުޖެހިއެވެ.

އޭގެ ފަހުން އަނެއްކާ ވެސް އިތުރު ބައްދަލުވުމަކަށް ދެޤައުމުން މިވަނީ ތައްޔާރުވެފައެވެ. މިފަހަރު ފްލޮރިޑާގެ މިއާމީގައި ހަފްތާ ބަންދާއި ދިމާކޮށެވެ. މިއީ ޔޫކްރޭންގައި އެމެރިކާ އާއި ޔޫރަޕުން ރަޝިޔާ އާއި ދެކޮޅަށް ގާތްގަނޑަކަށް ހަތަރު އަހަރު ވަންދެން ކުރަމުންދާ ހަނގުރާމަ ނިމުމަކަށް ގެނައުމަށް ބާއްވާ މަޝްވަރާ ބައްދަލުވުންތަކުގެ ތެރެއިން މި އަހަރު އެމެރިކާގައި ރަޝިޔާ އާއި އެކު ބާއްވާނެ އެންމެ ފަހު ބައްދަލުވުމަށް ވުމަކީ އެކަށީގެންވާ ކަމެކެވެ.

މި މަޝްވަރާތަކުގައި ވެސް ރަޝިޔާގެ ޑައިރެކްޓް އިންވެސްޓްމަންޓް ފަންޑުގެ އިސްވެރިޔާ އަދި ރައީސް ވްލަޑިމީރް ޕޫޓިންގެ ހާއްސަ މަންދޫބެއް ކަމަށްވާ ކިރިލް ޑިމިޓްރީވް އާއި ޔޫކްރޭންގެ ޞުލްޙަ އަށް ޓްރަމްޕުގެ ފަރާތުން އައްޔަންކުރައްވާފައިވާ ޚާއްޞަ މަންދޫބު ސްޓީވް ވިޓްކޯފް އާއި ރައީސް ޑޮނަލްޑް ޓްރަމްޕްގެ އިސް މުޝީރު އަދި ދަރިކަނބަލުންގެ ފިރިކަލުން ޖޭރެޑް ކުޝްނާ ބައިވެރިވެ ވަޑައިގަންނަވާނެއެވެ.

މީގެ ކުރިން މޮސްކޯ އަދި ޖެނީވާ ގައި ބޭއްވި ބައްދަލުވުން ތަކާއި، ބާލިން ގައި އެމެރިކާ އާއި ޔޫކްރޭން އަދި ޔޫރަޕްގެ ގުޅިފައިވާ މަޝްވަރާތައް ހިމެނޭ ގޮތަށް، ބޭއްވި މަތީ ފެންވަރުގެ އެއްވެސް ބައްދަލުވުމެއްގައި ޔޫރަޕުން އެމެރިކާ މެދުވެރިކޮށް ރަޝިޔާގެ ކިބައިން އެދުނު އެއްވެސް ކަމަކަށް (އަސީރުން ބަދަލުކުރުން ފިޔަވައި) ރަޝިޔާ އެއްބަސްވެފައެއް ނުވެއެވެ. މިހާތަނަށް ކުރި މަޝްވަރާތަކަކީ "ބިނާކުރުވަނިވި" ގުޅުންތަކެއް ކަމަށް ހުރިހާ ފަރާތަކުން ސިފަކުރި ނަމަވެސް ހަނގުރާމަ ހުއްޓައިލާނީ ރަޝިޔާގެ މަޤްޞަދުތައް ޙާޞިލް ވުމުން ކަމަށް އެ ޤައުމުން ދަނީ ތާއަބަދު ބުނަމުންނެވެ. .

ހަނގުރާމަ ހުއްޓާލުމަށް އެމެރިކާއިން ވަނީ ޞުލްޙައިގެ ޕްލޭނެއް ވެސް އެކުލަވާލާފައެވެ. ނަމަވެސް އެ ޕްލޭނުގައި ހިމެނޭ ޔުކްރޭނުގެ އަސްކަރިއްޔާގެ ބާރާއި ގުޅޭ ކަންކަން އުނިކޮށް އިތުރު ޑްރާފްޓެއް އީޔޫ އާއި ޔުކްރޭނުން ވަނީ އެމެރިކާ އާއި ޙަވާލު ކޮށްފައެވެ. އެހެންކަމުން މި ފަހަރުގެ ބައްދަލުވުމުގައި ވެސް ހަނގުރާމަ ހުއްޓާލަން ރަޝިޔާ އިން އެއްބަހެއް ނުވާނެއެވެ.