ބޭންކް އޮފް މޯލްޑިވްސް އިން ވިސާ އިންފިނިޓް ކްރެޑިޓް ކާޑާއެކު ރާއްޖެއަށް ފުރަތަމަ ފަހަރަށް މެޓަލް ކާޑެއް ތައާރަފްކޮށްފި އެވެ.
ވިސާ އިންފިނިޓް ކާޑަކީ ވީއައިޕީ ލެވެލްގައި ދުނިޔޭގެ ފެންވަރުގެ ހިދުމަތް ލިބޭނެ ކާޑެކެވެ. މި ކާޑާއެކު މަތީ ފަންތީގެ އަދި އީޖާދީ ޕޭމަންޓްގެ ހައްލު ގެނެސްދޭ ބޭންކަކަށް ބީއެމްއެލް ވެގެންދާނެ އެވެ.
މި ކާޑާއެކު 2،000 އަށްވުރެ ގިނަ ޕްރިމިއާ ލައުންޖުތަކަށް އެކްސެސް ލިބި، ޕްރިއޯރިޓީ ރިޒަވޭޝަން ހިދުމަތްތަކާއި، ޝެފް ޓޭބަލް އިވެންޓުތަކާއި އާޓް ޝޯވް އަދި ކޮންސާޓް ތަކަށް ހާއްސަ އެކްސެސް ލިބުމާއި، ހިލޭ ގޯލްފް ކުޅެން ލިބުމާއި ސްޕާގެ އެންމެ ފުރިހަމަ ހިދުމަތްތަކާއި އެލީޓް ކުލަބުގެ މެމްބާޝިޕް ލިބިގެންދާނެ އެވެ.
މީގެ އިތުރުން މުނިފޫހިފިލުވުމުގެ ގޮތުން ޕްރިމިއާ ސަބްސްކްރިޕްޝަންތަކާއެކު ފުޑް ޑެލިވަރީ އާއި އެންމެ ކުރިއަރާފައިވާ އާޓިފިޝަލް އިންޓަލިޖެންސް އެޕްލިކޭޝަންތަކުގެ ހިދުމަތްތަކާއެކު ޑިޖިޓަލް ހިދުމަތްތައް ވެސް މި ކާޑާއެކު ލިބިގެންދާނެ އެވެ.
ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފު ވިދާޅުވީ މިފަދަ ކާޑެއް ކަސްޓަމަރުންނަށް ފޯރުކޮށްދެވުމަކީ ލިބޭ ފަހުރެއް ކަމަށާއި މި ކާޑާއެކު ހާއްސަ އެކްސްކްލޫސިވް ފައިދާތަކާއެކު ލަގްޒަރީ ހިދުމަތްތަކެއް ލިބިގެންދާނެ ކަމަށެވެ.
ދުނިޔޭގައި އެންމެ ކުރިއަރާފައިވާ ވިސާ ކާޑު އެންމެ ފުރަތަމަ 2002 ވަނަ އަހަރު ރާއްޖެއަށް ތައާރަފްކުރީ ވެސް ބީއެމްއެލް އިންނެވެ. ނިމިދޔަ އަހަރު ބީއެމްއެލް އިން ވަނީ ރާއްޖެއަށް ވިސާ ޝަރީއާ ކޮމްޕްލަޔަންޓް ވިސާ ކްރެޑިޓް ކާޑެއް ވަނީ ތައާރަފް ކޮށްފަ އެވެ. މީގެ އިތުރުން ވިސާ ކްލެސިކް ގޯލްޑް، ޕްލެޓިނަމް ވިސާ ކްރެޑިޓް ކާޑް، ކްލެސިކް ޑެބިޓް އަދި ޕްލެޓިނަމް ކާޑުތައް ވެސް ބީއެމްއެލް އިން އަންނަނީ ދޫކުރަމުންނެވެ.
