ވިލިމާލެ ޕޮލިސް ސްޓޭޝަންގެ ބެލުމުގެ ދަށުގައި ހުރި ސިނގިރޭޓް ކާޓަންތަކެއް ވަގަށްނެގި މައްސަލައިގައި ޕޮލިސް ސީނިއާ ސާޖަންޓަކު ހައްޔަރުކޮށްފި އެވެ. 

މި މައްސަލަ ފެންމަތިވީ ނިމިދިޔަ ނޮވެމްބަރުގައެވެ. މިމައްސަލައިގެ މައުލޫމާތު ހާމަކޮށް ފުލުހުން ބުނީ މިތަކެއްޗަކީ، ވަގަށް އެތެރެކޮށްފައިވާކަމުގެ ތުހުމަތުގައި ބިދޭސީއެއްގެ އަތުން މިއަހަރުގެ މެއި މަހުގެ 23 ވަނަ ދުވަހު ނެގި ސިނގިރޭޓުތަކެއް ކަމަށެވެ. ބިދޭސީ މީހާ އަތުން އަތުލައިގަތް 32 ކާޓަން ސިނގިރޭޓު ވިލިމާލޭ ޕޮލިސް ސްޓޭޝަނުގެ ބެލުމުގެ ދަށުގައި ބަހައްޓާފައި ހުއްޓާ އޭގެތެރެއިމް 6 ކާޓަން މަދުވެފައިވާކަމަށް ބުންޏެވެ. މިތަކެތި މަދުވިކަން އެނގުނީ މިތަކެތި ކަސްޓަމްސްއާއި ހަވާލުކުރުމަށް މިދިޔަ މަހުގެ 12 ވަނަ ދުވަހު ބެލުމުންނެވެ.

އެ މައްސަލަ ތަހުގީގު ކުރަމުން ދަނިކޮށް މިދިޔަ އަހަރުގެ ޑިސެމްބަރު މަހުގެ 23 ވަނަ ދުވަހު ދެ ބިދޭސީއެއްގެ އަތުން ފުލުހުންގެ ބެލުމުގެ ދަށަށް ގެންދިޔަ 25 ކާޓަން ސިނގިރޭޓު ގެއްލިފައިވާކަންވެސް ވަނީ އެނގިފައެވެ.

ފުލުހުން ބުނީ ވިލިމާލެ ޕޮލިސްޓޭޝަނުގެ ބެލުމުގެ ދަށުގައި ހުރި ސިނގިރޭޓު މަދުވެފައިވާ މައްސަލައާ ގުޅިގެން ހައްޔަރުކޮށްފައިވަނީ އދ. ދިގުރަށް/ ޝަބުނަމީގެ، މުނައްވަރު އާދަަމް (39އ) ކަމަށެވެ. މުނައްވަރު އާދަމް އަކީ ފުލުހުންގެ ސީނިއާ ސާޖަންޓް ރޭންކުގައި ހުރި މުވައްޒަފެކެވެ. މައްސަލައާ ގުޅިގެން އޭނާ ވަނީ ސަސްޕެންޑްކޮށްފައެވެ.

ފުލުހުން ބުނީ މިމައްސަލައިގެ ތަހުގީގު މިހާރު ކުރިއަށް ދަނީ ފުލުހުންނާއި ނޭޝަނަލް އިންޓަގްރިޓީ ކޮމިޝަން ގުޅިގެން ޖޮއިންޓް އިންވެސްޓިގޭޝަނެއްގެ ގޮތުގައި ކަމަށެވެ.