ސީރިއާގެ ކުރީގެ ރައީސް ބައްޝާރުލް އަސަދުގެ ވެރިކަމުގައި ހިންގި ހަމަނުޖެހުންތަކުގައި 2011 އިން ފެށިގެން 2024 އާއި ހަމަޔަށް އެ ޤައުމުގެ އިންޓެލިޖެންސުންނާއި މިލިޝިއާތަކުން 300,000އެއްހާ މީހުން ވަގަށް ނެގި އިރު، އެ މީހުން އަދިވެސް ނުފެންނަ ކަމަށާއި، އައު ސަރުކާރަށް 1 އަހަރު ވީ އިރު އިންސާފު ވެސް ހޯދައި ނުދެވުނު ކަމަށް ބުނެ ސީރިއާގެ ރައްޔިތުން ކަންބޮޑުވުން ފާޅުކުރަން ފަށައިފިއެވެ.
އަސަދުގެ ޢާއިލާގެ ވެރިކަން ނިމުނުތާ އެއް އަހަރު ވުމުގެ މުނާސަބަތުގައި ސީރިއާގެ ޙަމާ ސިޓީގައި އުފާ ފާޅުކުރަމުންދާއިރު، ބައެއް ރިޕޯޓުތަކުން ބުނާ ގޮތުގައި މިދިޔަ އަހަރާއި ހަމަޔަށް ސީރިއާގެ 500,000 އާއި 620,000 އާއި ދެމެދުގެ ޢަދަދަކަށް މީހުންނަށް ވީނުވީއެއް ނޭނގެއެވެ. ޙަމާ ސިޓީ އަކީ އަސަދުގެ ބައްޕަގެ ވެރިކަމުގައި ބޮން އަޅައި އެތައް ހާސް ބަޔަކު މަރާލާފައިވާ ސިޓީ އެކެވެ.
މަރާލާފައިވާ މީހުންނާއި ގެއްލުވާލާފައިވާ މީހުން ހޯދުމަށް ސީރިއާގެ މިހާރުގެ ރައީސް އަޙްމަދު އަލް-ޝަރާޢުގެ ސަރުކާރުން އުފައްދާފައިވާ ނޭޝަނަލް ކޮމިޝަން އޮން މިސިންގ ޕާސަންސް އިން ބުނީ އަސަދުގެ ވެެރިކަމުގައި ބައެއް މީހުން ޖަލުތަކުގެ ތެރޭގައި ވެސް މަރާލުމަށް ފަހު ވަޅުލާފައިވާ ކަމަށް ލަފާ ކުރެވޭ ކަމަށާއި ނުވަތަ ގިނަ ޢަދަދެއްގެ ބަޔަކު މަރައިލުމަށް ފަހު ވަޅެއް ކޮނެ، ވަޅުލާފައިވާ ކަމަށް ވުމަކީ އެކަށީގެންވާ ކަމެއް ކަމަށް ބެލެވޭ ކަމަށެވެ.
އަސަދުގެ ސަރުކާރުން ހިންގި ޖަރީމާތައް ބަލާނެ ކަމަށް ސީރިއާގެ މިހާރުގެ ސަރުކާރުން ބުނި ކަމުގައި ވިޔަސް، އެއްއަހަރު ވީއިރު އިންސާފު ހޯދައިދީފައި ނުވާތީވެ، ޢާންމުންގެ ޝަކުވާތަކަށް ޖަވާބު ދެމުން ނޭޝަނަލް ކޮމިޝަން އޮން މިސިންގ ޕާސަންސް އިން ބުނީ އެ ކޮމިޝަނުގެ މަސައްކަތްތައް ލަސް ވަނީ ވަރަށް ގިނަ ފޮރިންސިކް ޓެސްޓުތައް ހެދުމަށް ލެބޯޓަރީތައް ބޭނުންވާތީ އާއި އެތައް މިލިއަން ރެކޯޑްތަކެއް އެއްކުރަން ޖެހޭތީއެވެ.
