ނޭޓޯގެ އިންޓެލިޖެންސްގެ ކަންތައްތަކާއި، މިސައިލް ޑިފެންސާއި އަދި ނޭޓޯގެ ޑިފެންސާއި ބެހޭ އެންމެހާ ކަމެއް ވެސް 2027 އަށް ފަހު ބަލަހައްޓަން ޖެހޭނީ ޔޫރަޕުން ކަމަށާއި، އެމެރިކާ އަށް ޑިޕެންޑް ވެގެން ނުހުރުމަށް ޑޮނަލްޑް ޓްރަމްޕުގެ ސަރުކާރުން ނޭޓޯގެ ޔޫރަޕުގެ މެންބަރު ޤައުމުތަކަށް އަންގައިފިއެވެ.
ޔޫރަޕާއި އުތުރު އެމެރިކާގެ ޤައުމުތައް ހިމެނޭހެން ޖުމްލަ 32 މެމްބަރު ޤައުމު ނޭޓޯގައި ވެއެވެ. މީގެތެރެއިން ނިއުކްލިއާ ހަތިޔާރު އުފެއްސުމުގެ ޤާބިލްކަން ހުރީ އެމެރިކާ، ފްރާންސް އަދި އިނގިރޭސިވިލާތް މި ތިންޤައުމުގައި ކަމުގައި ވިޔަސް ނޭޓޯގެ އެހެން މެންބަރު ޤައުމުތަކާއި މިތަކެތި ހިއްސާ ކުރެއެވެ.
ސަލާމަތީ ކަންކަމުގައި ނޭޓޯގެ ޤައުމުތަކުން އެމެރިކާ އަށް ޑިޕެންޑް ނުވުމަށް އެންގިއިރު، އެ އިއްތިހާދަށް މިހާރު ވަނީ ބޮޑެތި ގޮންޖެހުންތަކާއި ކުރިމަތިލާން ޖެހިފައެވެ. ނޭޓޯ އަށް ޔުކްރޭން ވެއްދިޔަ ނުދިނުމަށް ރަޝިޔާ ފެށި ހަނގުރާމަ އާއި އެކު ނޭޓޯގެ މެމްބަރުން އެންމެ ފަހުން އެއްބަސްވީ ޖީޑީޕީގެ %5 އަށް ޑިފެންސް ބަޖެޓް ވެސް މަތިކުރުމަށެވެ.
މުޙައްލިލުން ބުނާ ގޮތުގައި މިހާ ކުރު މުއްދަތެއްގެ ތެރޭގައި ޔޫރަޕަށް އެމީހުންގެ ޤާބިލްކަން އިތުރުކުރާނެ ވަޞީލަތްތަކެއް ނެތެވެ.
އެހެންކަމުން މިއީ ފަހަރުގައި ޔޫރަޕު ލައްވައި އެމެރިކާގައި ހުރި އިތުރު ހަތިޔާރާއި ސާމާނާއި ޓެކްނޮލޮޖީތައް ގަތުން މަޖުބޫރުކުރުވައިގެން ނޭޓޯގެ ބާރު އިތުރަށް ވަރުގަދަ ކުރުމަށް ކުރާ ކަމެއް ކަމަށް ވުމަކީ ވެސް އެކަށީގެންވާ ކަމެކެވެ. ނުވަތަ އެމެރިކާ އިން ވެނެޒުއެލާ އާއި އީރާނު ސަރަޙައްދަށް ބޮޑަށް. ފޯކަސް ކުރާތީވެ ބުނި އެއްޗަކަށް ވެސް ވެދާނެއެވެ،
ކޮންމެޔަކަސް، މިއީ، 2027 ވަނަ އަހަރުގެ ނިޔަލަށް ޔޫރަޕަށް އެ މީހުންގެ ޤާބިލްކަން ފުރިހަމަ ނުކުރެވިއްޖެނަމަ، ނޭޓޯގެ ޑިފެންސާއި ގުޅުން ހުރި މަޢުލޫމާތު ހިއްސާކުރުމުގެ މުހިންމު ބައެއް މަސައްކަތްތަކުން އެމެރިކާ ވަކިވެދާނެ ކަމުގެ އިޝާރާތެކެވެ.
