ހުޅުމާލެ ފުރުތަމަ ފިޔަވައްސާއި ދެވަނަ ފިޔަވަހީގެ ބައެއް މަގުތައް މަރާމާތުކުރުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އިން ޗައިނާގެ ކުންފުންޏަކަށް ހަވާލުކޮށްފި އެވެ.

މިކަމާ ގުޅިގެން މިދިޔަ ބުދަ ދުވަހު އެޗްޑީސީގައި ބޭއްވި ރަސްމިއްޔާތުގައި 1.1 ކިލޯ މީޓަރުގެ މަގު މަރާމާތުކުރުމުގެ މަސައްކަތް ހަވާލުކޮށްފައިވަނީ ޗައިނާގެ ރޮޓައިމް އިންޖިނިއަރިން އެންޑް ޓެކްނޮލޮޖީ ކުންފުންޏަށެވެ. މި މަސައްކަތް އެ ކުންފުންޏާ ހަވާލުކޮށްފައިވަނީ ފަސް މަސްދުވަހާއި ހަ މަސްދުވަހުގެ ތެރޭގައި މަސައްކަތް ނިންމާ ގޮތަށެވެ.

މި މަޝްރޫއުގެ އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ އެ ކޯޕަރޭޝަންގެ މެނޭޖިން ޑިރެކްޓަރު އަލީ ޒުހެއިރެވެ. އަދި ރޮޓައިމް އިންޖިނިއަރިންގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ޖޯވޭޑޮންގު އެވެ.

މި މަޝްރޫއުގެ ދަށުން، ހުޅުމާލެ ފުރުތަމަ ފިޔަވަހީގައި މިހާރު މަރާމާތުކުރަން ޖެހިފައިވާ މަގުތައް ކަމުގައިވާ ފިތުރޯނު މަގާއި އެ މަގާ ގުޅިފައިވާ ގޯޅިތަކުގެ ތެރެއިން ތާރުގަނޑު ހަލާކުވެފައިވާ މަގުތަކާއި، ހުޅުމާލެ ދެވަނަ ފިޔަވަހީގެ ވިނަރެސް ފްލެޓްތަކާ އިންވެގެން ހުރި މަގު ހެދުމަށް ވަނީ ހަމަޖެހިފަ އެވެ.

މި މަސައްކަތް ކުރިއަށް ގެންދާނީ ހުޅުމާލެ ފުރުތަމަ ފިޔަވަހިން ފަށައި، ހުޅުމާލެ ދެވަނަ ފިޔަވައްސަށް ނިންމާ ގޮތަށެވެ.