އައްޑޫ ސިޓީ އިން ހައްޔަރުކުރެވުނު މަސްތުވާތަކެތީގެ ވިޔަފާރި ފުޅާ ދާއިރާއެއްގައި ކުރާ ބޮޑު ނެޓްވޯކެއްގެ އިސްފަރާތްތަކުގެ ވަނަވަރުތައް ފުލުހުން ހާމަކޮށްފި އެވެ.

މި ނެޓްވޯކުން ހައްޔަރުކުރެވުނު އިސްވެރިންނަކީ؛

1. އަލީ ނަދީމް (30އ)، ސ. ހިތަދޫ / ކޮންމުލި
2. ހާފިޡު ފައުޒީ (31އ)، ސ. ހިތަދޫ / ފަލާހް
3. އިބްރާހިމް ސިރާޖް (43އ). ސ. ހިތަދޫ / ވެޔޮފެހެބުރުގެ
4. ހަސަން އަލްފާފް (28އ)، ސ. ހިތަދޫ / ދޮރުފޮތިމާގެ
5. އަމީން މުހައްމަދު (23އ)، ސ. ހިތަދޫ / ކެކުރިމާގެ

މަސްތުވާތަކެއްޗާ ދެކޮޅަށް "އޮޕަރޭޝަން އަލިމަގު" މި ޝިއާރުގެ ދަށުން ފުލުހުން އައްޑޫ ސިޓީން މި ފަރާތްތައް ހައްޔަރުކޮށްފައިވަނީ ރޭގެ ވަގުތެއްގަ އެވެ.

ފުލުހުން ބުނެފައިވަނީ މި މައްސަލައާ ގުޅިގެން ހައްޔަރުކުރެވުނު މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން އަލީ ނަދީމާއި ހާފިޡު ފައުޒީ އަދި އިބްރާހިމް ސިރާޖުގެ ބަންދަށް 30 ދުވަސް ޖަހާފައިވާ ކަމަށެވެ. އަދި ހަސަން އަލްފާފް އާއި އަމީން މުހައްމަދުގެ ބަންދަށް ފަސް ދުވަސް ޖަހާފައިވާ ކަމަށެވެ.

ފުލުހުން ބުނީ މި ނެޓްވޯކުގެ އިސްފަރާތްތަކަށް އަމާޒުކޮށްގެން މަސްތުވާތަކެތި ޓްރެފިކް ކުރުމާއި މަނީ ލޯންޑާ ކުރުމުގެ އިންވެސްޓިގޭޝަން އެ އިދާރާއިން ފަށާފައިވަނީ މިއަހަރުގެ މާޗު މަހުން ފެށިގެން ކަމަށެވެ.

މި ނެޓްވޯކުގެ ތެރެއިން 2017 ވަނަ އަހަރުން ފެށީގެން މަސްތުވާތަކެތީގެ ވިޔަފާރިކުރާކަން ފުލުހުންނަށް އެއްކުރެވުނު މައުލޫމާތުގެ އެހީގައި ހޯދިފައޮވާ ކަމަށާއި ފާއިތުވި ފަސް އަހަރު ދުވަހުގެ ތެރޭގައި މި ނެޓްވޯކުގެ އިސް ހަތަރު މީހެއްގެ އެކައުންޓުގައި 19 މިލިއަނަށްވުރެ ގިނަ ދިވެހި ރުފިޔާ ދައުރުކޮށްފައިވާ ކަމަށްވެސް ފުލުހުން މައުލޫމާތު ދެ އެވެ.

މަސްތުވާތަކެތީގެ ވިޔަފާރި ކުރަމުންދާ ފަރާތްތަކަށް ބޮޑެތި އަދަބުތައް ދޭން ރައްޔިތުންގެ މަޖިލީހުން އިއްޔެ ވަނީ ފާސްކޮށްފަ އެވެ. އެގޮތުން މަސްތުވާތަކެތި ބޭނުންކުރާ ފަރާތްތަކަށް ކަނޑައަޅާ އުމުރު ދުވަހުގެ ޖަލު ހުކުމުގެ ގޮތުގައި އޮންނަ 25 އަހަރުގެ އަދަބު އުވާލައި، އެ މީހަކު މަރުވަންދެން ޖަލުގައި ހުންނަން ޖެހޭ ގޮތަށް ބަދަލުކުރުމަށް ރައްޔިތުންގެ މަޖިލިހުން އިއްޔެ ވަނީ ފާސްކޮށްފަ އެވެ.