ސައުދީން ފަލަސްތީނަށް 90 މިލިއަން ޑޮލަރު ދީފި

ޙާލުގައި ޖެހިފައިވާ ފަލަސްޠީނުގެ މުސްލިމު ރައްޔިތުންނަށް އެހީތެރިވުމަށް ސައޫދީ ޢަރަބިއްޔާއިން ހިލޭ ސާބަހަށް 90 މިލިއަން ޑޮލަރު ދީފިއެވެ.

މި ފައިސާ ފަލަސްޠީނާއި ޙަވާލުކުރީ ޢައްމާނުގައި އޮތް ބައްދަލުވުމުގައި ސައުދީ ސަފީރު ޕްރިންސް މަންސޫރު ބިން ޚާލިދެވެ.

ނޫސްތަކުގެ ސުރުޚީ ތަކަށް ނޭރި ކަމުގައި ވިޔަސް ސައުދީ އަރަބިއްޔާއިން އަބަދުވެސް ފަލަސްޠީނަށް މާލީ ގޮތުން ވަރަށް ބޮޑަސް އެހީތެރިކަން ފޯރުކޮށްދެއެވެ. ޚާއްޞަކޮށް ޣައްޒާއާއި ހުޅަނގު އައްސޭރިއަށް ޒައެނިސްޓުންގެ ފަރާތުން ދިމާވާ ކަންކަމުގައި ވެސް ފަލަސްޠީނު ރައްޔިތުންނަށް އެންމެ ބޮޑު އެހީތެރިކަމެއް ވަނީ ސައޫދީންނެވެ.

ވަރަށް ފަހުން ވެސް ސައުދީ އަރަބިއްޔާއިން ވަނީ ކާބޯތަކެއްޗާއި ޞިއްޙީ ކަންކަމަށް ބޭނުންވާ ސާމާނާއި ކުއްލި ހިޔާވަހިކަމަށް ބޭނުންވާ ފަލަސްޠީނު ރައްޔިތުންނަށް ވޯލްޑް ފުޑް ޕްރޮގްރާމް މެދުވެރިކޮށް ވެސް މިއަހަރު 30 މިލިއަން ޑޮލަރު ދީފައެވެ. އަދި މިދިޔަ އަހަރު ޔޫއެންއާރުޑަބްލިއުއޭ މެދުވެރިކޮށް ފަލަސްޠީނަށް އެހީ ވުމަށް ސައުދީ އިން 40 މިލިއަން ޑޮލަރު ފޯރުކޮށްދިނެވެ. މީގެ އިތުރުން ސައުދީ އަރަބިއްޔާގެ ގައުމީ ފަންޑް ރެއިސިން ކެމްޕޭނުން ޣައްޒާގެ ޒަޚަމްވެފައިވާ މީހުންނާއި ގެދޮރު ގެއްލިފައިވާ ޢާއިލާތަކާއި، ހޮސްޕިޓަލްތަކާއި، ރިލީފް އޮޕަރޭޝަންތަކަށް އެހީތެރިވުމަށް 165 މިލިއަން ޑޮލަރު ހޯދިއެވެ.

ސައުދީ އަރަބިއްޔާއިން ވަނީ ފާއިތުވި ފަސްއަހަރުތެރޭ ފަލަސްޠީނުގެ ރައްޔިތުންނަށް 5.3 ބިލިއަން ޑޮލަރަށް ވުރެ ގިނައިން ހޭދަކޮށްފައެވެ.