އީރާނުން މިސައިލް ސިސްޓަމްތައް އަލުން ތަރައްޤީ ކުރުމުގެ މަސައްކަތް އަވަސް ކުރަމުންދާއިރު، ތެހެރާނަކީ މި ވުޖޫދުގައިވާ ވަރަށް ބޮޑު ނުރައްކަލެއް ކަމަށް ބުނެ އިސްރާއީލުން އިންޒާރު ދީފިއެވެ. އިސްރާއީލުގެ ޖާސޫސީ މަސްދަރުތަކުން ބުނީ އީރާނުން މިހާރު ދަނީ އެމެރިކާ އާއި އިސްރާއީލުން ގުޅިގެން އީރާނަށް ދިން ޙަމަލާތަކުން ލިބުނު ފިލާވަޅުތަކުން، ޙަމަލާ ދިނުމުގެ ގާބިލްކަން އަލުން ބިނާކުރަމުން ކަމަށާއި، އީރާނަށް ޙަމަލާ ދިނުމުގެ ޕްލޭނެއް އިސްރާއީލުން އެކުލަވާލަމުންދާ ކަމަށެވެ.
އިސްރާއީލުން މިވަރުގެ ޕްލޭނެއް ހަދަމުންދާއިރު، ފާހަގަ ކޮށްލަން ޖެހޭ ކަމަކީ، އިސްރާއީލު ދުނިޔޭގެ ޗާޓުން ވެސް ފޮހެލާނެ ކަމަށް ބުނެ އީރާނުން މީގެ ކުރިން ދީފައިވާ އިންޒާރެވެ.
އަނެއްކޮޅުން އިސްރާއީލުގެ ޖާސޫސުންނާއި ޙަވާލާދީ ރިޕޯޓުތައް ބުނާ ގޮތުގައި އީރާނުގެ ނިއުކްލިއާ ޕްރޮގްރާމަކީ އެމެރިކާ އާއި އިސްރާއީލުން ކުރިން ހީކުރި ވަރަށް ވުރެ މާ ވަރުގަދަ އަދި ފުޅާ ޕްރޮގްރާމެކެވެ. އޭގެ ބޮޑު ބައެއް ފޮރުވާފައި ވަނީ އީރާނުގެ މެދުތެރޭގައި ހުންނަ އިސްފަހާންގެ ނުވަތަ ފާރިސީ ފަރުބަދައިގެ 360 ފޫޓަށް ވުރެ އަޑީގައެވެ. އެހެން ކަމުން އެމެރިކާގެ އެންމެ ޒަމާނީ ބަންކާބަސްޓާ ބޮމުން ވެސް އެ ފެސިލިޓީ ނައްތައެއް ނުލެވޭނެއެވެ.
އީރާނުން މިހާރު ވަނީ ހަތިޔާރުތައް އަޕްގްރޭޑް ކޮށްފައެވެ. މިސައިލްތައް ފޮނުވާނެ ޕްލެޓްފޯމްތައް އިތުރުކޮށް، ބިމުގެ އަޑީގައި ވަނީ ވަރުގަދަ މިލިޓަރީ ބޭސްތައް ހަދާފައެވެ. މިކަމުގެ ސަބަބުން މެދުއިރުމަތިން ބޭނުން ކޮންމެ ދިމާލަކަށް ޙަމަލާ ދިނުމުގެ ޤާބިލުކަން އީރާނުގައި އެބަހުއްޓެވެ.
މުހައްލިލުން ބުނާ ގޮތުގައި އީރާނުން ވަނީ ރަޝިޔާ އާއި ޗައިނާގެ އެހީގައި ވަރަށް ބޮޑަށް އަސްކަރީ ބާރު އިތުރުކޮށްފައެވެ. އޭގެ ތެރޭގައި މިސައިލް ރޭންޖު އިތުރުކޮށް، ވޯހެޑް ކެޕޭސިޓީ ވަނީ ފުޅާކޮށްފައެވެ. އީރާނުގެ ސިފައިންގެ އަތުގައި މިހާރު ދުރު ރާސްތާގެ ބެލިސްޓިކް މިސައިލްތަކާއި، ކަނޑުއަޑިން ޙަމަލާތައް ދިނުމުގެ ޤާބިލްކަން ހުރި ޒަމާނީ ޑްރޯންތަކާއި، ކްރޫޒް މިސައިލްތައް ހުރެއެވެ. މި ކަންކަމުގެ ސަބަބުން އިސްރާއީލު ވެސް އަދި އެމެރިކާ ވެސް ފަސްޖެހެއެވެ.
