ލީގުގައި ރޭ ފުލަމް މައްޗަށް މޮޅުވި މެޗުގައި ކާމިޔާބުކުރި ގޯލާއެކު މެންޗެސްޓާ ސިޓީގެ ފޯވާޑު އާލިން ހާލަންޑު އޭނާ ޕްރިމިއާ ލީގުގައި ޖެހި ގޯލުގެ އަދަދު 100 އަށް އަރައިފި އެވެ.
ހާލަންޑް ޕްރިމިއާ ލީގުގައި ކާމިޔާބުރި 100 ވަނަ ގޯލާއެކު އޭނާ ވެފައިވަނީ އެ ލީގުގައި އެންމެ އަވަހަށް އެ އަދަދަށް ގޯލު ހަމަކުރި ފުރަތަމަ ކުޅުންތެރިޔާ އަށެވެ. އެއީ 111 މެޗުންނެވެ. މި ރެކޯޑް ކުރިން އޮތީ އެލެން ޝިއެރާ އަތުގަ އެވެ. ޝިއެރާ އަތުގައި ކުރިން މި ރެކޯޑު އޮތީ 124 މެޗުން 100 ގޯލު ހަމަކޮށްގެންނެވެ. ޝިއެރާ އަކީ އަދިވެސް ޕްރިމިއާ ލީގުގައި އެންމެ ގިނަ ގޯލު ޖެހި ކުޅުންތެރިޔާ އެވެ.
ރޭގެ މެޗުގައި ސިޓީ މޮޅުވެފައިވަނީ 4-5 ގެ ނަތީޖާ އިންނެވެ. މި މެޗުގައި ފުރަތަމަ ގޯލު 17 ވަނަ މިނެޓުގައި ކާމިޔާބުކުރީ ހާލަންޑެވެ. ދެވަނަ ގޯލު 37 ވަނަ މިނެޓުގައި ޓިއާނީ ރެއިންޑާސް ކާމިޔާބުކުރިއިރު 44 ވަނަ މިނެޓުގައި ސިޓީގެ ތިން ވަނަ ގޯލު ކާމިޔާބުކުރީ ފޮޑެން އެވެ. ފުރަތަމަ ހާފު ނިމެން ކުޑަ އިރުކޮޅަކަށް ވެފައިވަނިކޮށް ފުލަމްގެ ފުރަތަމަ ގޯލު ޖަހައިދިނީ ސްމިތް ރޯވް އެވެ.
ދެވަނަ ހާފުގައި 48 ވަނަ މިނެޓުގައި ފޮޑެން ވަނީ އޭނާގެ ދެވަނަ ގޯލު ޖަހައިފަ އެވެ. އަދި ސިޓީގެ ފަހު ވަނަ ގޯލަކީ 54 ވަނަ މިނެޓުގައި ފުލަމްގެ ސަންޑާ ބާގް އަތުން ބައިކޮޅަށް ވަތް ގޯލެކެވެ. އޭގެ ފަހުން ފުލަމް ވަނި އިތުރު ތިން ގޯލު ޖަހާފަ އެވެ. މި ގޯލުތައް ކާމިޔާބުކުރީ 57 ވަނަ މިނެޓުގައި އެލެކްސް އިވޯބީ، 72 އަދި 78 ވަނަ މިނެޓުގައި ސެމިއުލް ޗުކްވެޒޭ އެވެ.
މި މޮޅާއެކު ސިޓީ ވަނީ ވަގުތީ ގޮތުން އެއްވަނައިގައި އޮތް އާސެނަލްއާ އޮތް ފަރަގު ދެ ޕޮއިންޓަށް ކުޑަކޮށްފަ އެވެ. އާސެނަލް އަދި ބްރެންޓްފޯޑް ބައްދަލުކުރާ މެޗު އޮންނާނީ މިރޭ 00:30 ގައެވެ.
ރޭގައި ކުޅުނު އެހެން މެޗުތަކަށް ބަލާއިރު ބޯންމައުތްގެ މައްޗަށް 0-1 ގެ ނަތީޖާއިން އެވަޓަން މޮޅުވިއިރު ޓޮޓެންހަމް އާއި ނިއުކާސަލް ބައްދަލުކުރި މެޗު ނިމުނީ 2-2 ގެ ނަތީޖާއިންނެވެ.
