ލުބުނާނުގައި އޮތް އެމެރިކާއިން އުފައްދާފައިވާ ނުރައްކާތެރި ޖީބީޔޫ-39ބީ ގެ ބޮން ހޯދުމަށް އެމެރިކާ އާއި އިސްރާއީލުން މަސައްކަތް ފަށައިފިއެވެ. މި ބޮމަކީ ނޮވެމްބަރު 24 ވަނަ ދުވަހު އިސްރާއީލުން ލުބުނާނަށް ދިން ޙަމަލާގައި ނުގޮވާ އޮތް ބޮމެކެވެ. އެމެރިކާއިން ބިރު ގަންނަނީ މި ޓެކްނޮލޮޖީ ރަޝިޔާ އާއި ޗައިނާ އަދި އީރާން ފަދަ ޤައުމަކަށް ލިބިދާނެތީއެވެ.

ދާން ޖެހޭ މިސްރާބު ދެނެގަންނަ ގޮތަށް ފަރުމާ ކޮށްފައިވާ މި ބޮމަކީ ޢިމާރާތުގައި ޖެހުމާއި އެކު ޢިމާރާތް ތޮރުފާލައި ޢިމާރާތުގެ ފައުންޑޭޝަނާއި ހަމަޔަށް ގޮސް އަމިއްލައަށް ގޮއްވާލުމުގެ ޤާބިލްކަން ލިބިފައިވާ، 60 ކިލޯމީޓަރަށް ވުރެ ދުރަށް ދަތުރުކުރާ ބޮމެކެވެ. ޣައްޒާ ސުންނާފަތިކޮށްލުމުގައި ޒައެނިސްޓުން ވަނީ މި ބޮން ޓެސްޓު ކޮށްފައެވެ.

ބޮޑެތި ޓަވަރުތަކާއި ޓަނަލްތައް ގޮއްވާލުމުގެ ޤާބިލްކަން ލިބިފައިވާ 93 ކިލޯގެ މި ބޮން ރައްކާތެރިކަމާއި އެކު އެމެރިކާ އާއި ޙަވާލުކުރުމަށް އެދި ވޮޝިންޓަނުން މިހާރު ދަނީ ބެއިރޫތާއި ވާހަކަ ދައްކަމުންނެވެ.

މި ބޮން އޮތީ ލުބުނާނުގެ ކަމާބެހޭ ފަރާތްތަކުގެ ބެލުމުގެ ދަށުގައި ކަމެއް ނުވަތަ ހިޒްބުاللهގެ ކޮންޓްރޯލްގެ ދަށުގައިވާ ސަރަޙައްދުގައި ކަމެއް ވެސް ބެއިރޫތުން ކަށަވަރު ކޮށެއް ނުދެއެވެ.