ލަންކާއަށް މިހާރު ކުރަމުންދާ ތޫފާނާ ގުޅިގެން ހާލަތު އިތުރަށް ގޯސްވެ އެ ގައުމުގައި ކުއްލި ނުރައްކަލުގެ ހާލަތު އިއުލާނުކޮށްފި އެވެ.

ތޫފާން ދީތުވާގައި މިހާތަނަށް އެގައުމުގައި 135 އަށްވުރެ ގިނަ މީހުން މިހާތަނަށް މަރުވެފައިވާއިރު 15،000 އަށްވުރެ ގިނަ ގެދޮރު ސުންނާފަތިވެ 78،000 އަށްވުރެ ގިނަ މީހުން ވަނީ ވަގުތީ ހިޔާތަކަށް ބަދަލުކޮށްފަ އެވެ.

ވިއްސާރައިގައި ބޮޑެތި ގެއްލުންތަކެއް ވުމުގެ ސަބަބުން ލަންކާގެ ރައީސް އަނޫރާ ކުމާރާ ޑިސެޔަނަކް ވަނީ ބައިނަލްއަގުވާމީ އެހީތެރިކަމަށް އިއްޔެ އެދިފަ އެވެ. ރާއްޖޭގެ ފަރާތުން މިއަދު ވަނީ 50،000 ޔޫއެސް ޑޮލަރާއި 25،000 ކޭސް މަސްދަޅު ހަދިޔާކުރަން ނިންމާފަ އެވެ. އަދި ދައުލަތުގެ މީޑިއާ ޕީއެސްއެމްއިން ވަނީ ޓެލެތޯނެއް ކުރިއަށް ގެންދިއުމަށް ނިންމާފަ އެވެ.

މީހުން ސަލާމަތްކުރުމަށްޓަކައި ހެލިކޮޕްޓަރުތަކާއި ކުދި ބޯޓުތައް އަދި އެހެނިހެން ވަސީލަތްތައް ވެސް ދަނީ ބޭނުންކުރަމުންނެވެ.

ތޫފާނާއެކު ލަންކާ އަށް އިގްތިސާދީ ބޮޑު ލޮޅުމެއް އަންނާނެއިރު އެ ގައުމުގެ އިގްތިސާދީ ހާލަތު ވަރަށް ބޮޑަށް ގޯސްވުމަށްފަހު ރަނގަޅުވާން ފެށީ އިހަކަށް ދުވަހު އެވެ. 2017 ވަނަ އަހަރުވެސް ލަންކާ ވަނީ ބޮޑު ތޫފާނަކާ ކުރިމަތިލާން ޖެހިފަ އެވެ. އެ ފަހަރު 200 އަށްވުރެ ގިނަ މީހުން މަރުވެފައިވެ އެވެ.