ސްރީލަންކާގައި އުފެދިފައިވާ ތޫފާން (ތޫފާން ޑިޓުވާ)ގެ ސީދާ އަސަރު ރާއްޖެއަށް ނުކުރާނެކަމަށް މޫސުމާއި ބެހޭ ގައުމީ އިދާރާ (މެޓް އޮފީސް) އިން ބުނެފި އެވެ.
މިކަމާ ގުޅިގެން މެޓް އޮފީހުން އެކްސްގައި ހިއްސާކުރި ޕޯސްޓެއްގައި ބުނެފައިވާ ގޮތުގައި، ތޫފާން "ޑިޓުވާ" މިހާރު ހުރީ ހއ. ކެލާގެ އިރު އުތުރުން ގާތްގަނޑަކަށް 876 ކިލޯ މީޓަރު ދުރުން ސްރީލަންކާގެ އުތުރު އައްސޭރިފަށުގައި ކަމަށެވެ. މި ތޫފާން ދަތުރުކުރަމުން ދަނީ އިންޑިއާގެ ޓަމިލްނާޑޫ އާއި ދިމާލަށް ކަމަށާއި، ތޫފާނުގެ ސީދާ އަސަރު ރާއްޖެއަށް ނުކުރާނެ ކަމަށް މެޓް އޮފީހުން ވަނީ ބުނެފަ އެވެ.
މީގެ އިތުރުން މި ތޫފާނާއި ގުޅިގެން ހުދު ސަމާލު ނެރެވުނީ މެޓު އޮފީހުގެ އެލާޓް ދަރަޖަކުރެވިފައިވާ ސަރަހައްދަށް ތޫފާން ވަނުމުން ކަމަށް މެޓް އޮފީހުން ވަނީ ބުނެފަ އެވެ. އަދި މި ތޫފާނާއި ގުޅިގެން ކުރިއަށް އޮތް 24 ގަޑިއިރުވެސް ދެކުނާއި މެދުރާއްޖެތެރޭގެ އެކި ސަރަހައްދުތަކަށް ވިއްސާރަކޮށް ގުގުރާނެ ކަމަށް މެޓް އޮފީހުން ވަނީ ބުނެފަ އެވެ.
Advertisement
މެޓް އޮފީހުން އިތުރަށް ބުނެފައިވަނީ އަންނަ އަންގާރަ ދުވަހުން ފެށިގެން މޫސުން ރަނގަޅުވެގެންދާނެ ކަމަށެވެ.
ފާހަގަކޮށްލެވޭ ގޮތުގައި، ސްރީލަންކާއަށް މިހާރު ކުރަމުންދާ ވިއްސާރާގައި އުފެދުނު ކޮޅިގަނޑު ތޫފާނަކަށް ބަދަލުވެ، ބޮޑެތި ގެއްލުންތަކެއް ލިބި ގިނަ އަދަދެއްގެ ބަޔަކު ވަނީ މި ހާދިސާގައި މަރުވެފަ އެވެ.
