އިންސާނުންނަށް ފައިދާ ލިބޭ ގަސްގަހާގެހި ހިމާޔަތްކުރުމަކީ އިސްލާމްދީން ބާރުއަޅާ ކަމެއް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

ފޭސްބުކްގައި ހިއްސާކުރެއްވި ޕޯސްޓެއްގަ މިނިސްޓަރު ޝަހީމް ވިދާޅުވެފައިވާ ގޮތުގައި، އިސްލާމީ އާންމު އުސޫލުން ބަލާއިރު، މުޖުތަމައަށް ފައިދާވާ ގޮތަށް ހުންނަ ގަސްގަހާގެހި ކެނޑުމަކީ ހުއްދަކަމެއް ނޫން ކަމަށާއި، ވަކިން ހާއްސަގޮތެއްގައި އެ ގަހަކުން އިންސާނުންނަށް ހިޔާ ނުވަތަ މޭވާއާއި އެހެނިހެން ފައިދާތައް ލިބޭ ގަސްގަހާގެހި ރައްކާތެރިކޮށް ހިމާޔަތްކުރުމަކީ އިސްލާމް ދީން ނުހަނު ބާރު އަޅާފައިވާ ކަމެއް ކަމަށެވެ.

އެހެން ނަމަވެސް މީސްތަކުންނަށް ގެއްލުންވާ ގޮތަށް ހުންނަ ގަސްގަހާގެހި، ނުވަތަ ގެއްލުންވާ ގޮތަށް ހުންނަ ގޮފިތައް ކެނޑުމަކީ ދީނީ ނަޒަރުން ބަލާއިރު ހުއްދަކަމެއް ކަމަށް މިނިސްޓަރު ވިދާޅުވި އެވެ.

މިނިސްޓަރު ވިދާޅުވި ގޮތުގައި، އާންމު އުނދަގުލަކަށްވާ ގޮތަށާއި، މީސްތަކުންގެ ގޯތިގެދޮރަށް ގެއްލުންވާ ގޮތަށާއި، ނުވަތަ ހިނގާބިގާވެ އުޅޭ މީހުންނަށް ގެއްލުންވާ ގޮތަށް ހުންނަ ގަސްގަހާގެއްސާއި އެފަދަ ގަސްގަހުގެ ގޮފިތަކާއި މޫތައް ކެނޑުމަކީ ކުރުން ޖާއިޒު އަދި ގެއްލުމުގެ ކުޑަ ބޮޑު މިންވަރަށް ބަލައި ކުރުން ލާޒިމުވެގެންވާ ކަމެއް ކަމަށެވެ.

މިނިސްޓަރު ވިދާޅުވި ގޮތުގައި، އާންމު އުނދަގުލަކަށް ނުވާ ގޮތަށް ހުންނަ ގަސްގަހާގެހި ބަލަހައްޓައި އެއަށް ރައްކާތެރިކަން ދިނުމަކީ އިސްލާމް ދީނުގައި ނުހަނު ބާރު އަޅުއްވާފައިވާ ކަމެކެވެ. މީގެ އިތުރުން ގަސް އިންދުމާއި، ގަސްތައް އިތުރުކުރުމާއި، ވަކިން ހާއްސަކޮށް މޭވާ އާއި ހިޔާ ލިބޭ ގަސްގަހާގެހި ގިނަ ކުރުމަކީ އިސްލާމީ ނަޒަރުން ބަލާއިރު ވަރަށް މުހިންމު ކަމެއް ކަމަށާއި އެއްވެސް ސަބަބަކާ ނުލައި ހިޔާ ލިބޭ ގަހެއް ކަނޑާލައިފި ނަމަ ފާފަވެރި ވެދާނެ ކަމަށް މިނިސްޓަރު ވިދާޅުވި އެވެ.

މިނިސްޓަރު އިތުރަށް ވިދާޅުވީ، މީސްތަކުންނަށް ގެއްލުން ނުވާ ގޮތައް ހުންނަ ގަސްތައް ބެލެހެއްޓުމަކީ މުހިންމުކަމެއް ނަމަވެސް ގަސްގަހާގެހިން ގެއްލުން ލިބޭކަމުގައިވާނަމަ، އިސްކުރަންޖެހޭނީ އިންސާނުންގެ މަސްލަހުތު ކަމަށާއި، އެ ގަސް ކަނޑާލަންޖެހޭނެ ކަމަށެވެ.