ރާއްޖެ އަށް ދެ މިލިއަން ވަނަ ފަތުރުވެރިޔާ މިއަދު ޒިޔާރަތްކޮށްފި އެވެ. އިނގިރޭސީ ވިލާތުގެ އުމުރުން 30 އަހަރުގެ ބެތާނީ ސާރާ ކާސްވެލް މިއަދު ރާއްޖެ އައިސްފައިވަނީ އެގައުމުގެ އެއާލައިން ކަމަށްވާ ވާޖިން އެޓަލާންޓިކުން މިއަދު ހެނދުނު 10:57 ހާއިރު އެވެ.
ސާރާ ރާއްޖެ އައުމާއެކު ވިޒިޓް މޯލްޑިވްސްގެ ފަރާތުން އޭނާ އަށް ވަނީ ބޮޑުބެރުގެ ސަގާފީ ހަރަކާތްތަކާއެކު މަރުހަބާ ކިޔާފަ އެވެ. ސާރާ އާއި އޭނާގެ ފިރިމީހާއާ އެކު ރާއްޖެ އައިސްފައިވަނީ އެ ދެމީހުންގެ ހަނީ މޫންއަށެވެ. ވިޒިޓް މޯލްޑިވްސްގެ ފަރާތުން ވަނީ ސާރާ އަށް ހަދިޔާއެއްގެ ގޮތުގައި ސްޓޭންޑަޑް މޯލްޑިވްސް ރިސޯޓުން ހަފްތާއެއްގެ ޗުއްޓީއެއް ވެސް ދީފަ އެވެ. މި ދެ ލޯބިވެރިން ރާއްޖެ އައިސް ހަނީމޫން ޗުއްޓީ ހޭދަކުރުމަށް ހަމަޖެހިފައިވަނީ މާފުށިވަރު ރިސޯޓުގަ އެވެ.
މިއަހަރުގެ މިހާތަނަށް އިނގިރޭސީވިލާތުން ރާއްޖެއަށް 177،900 އަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު މިއީ ރާއްޖެއަށް ތިން ވަނައަށް އެންމެ ގިނައިން އަންނަ ގައުމެވެ. އެންމެ ގިނައިން މި އަހަރުވެސް އައިސްފައިވަނީ ޗައިނާ އިންނެވެ. މިހާތަނަށް ޗައިނާއިން 309،300 އަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު ދެވަނައިގައި ރަޝިއާ އޮތީ 250،000 އަށްވުރެ ގިނަ ފަތުރުވެރިންނާއެކު އެވެ.
މިދިޔަ އަހަރު މުޅި ޖުމްލަ 2.04 މިލިއަން ފަތުރުވެރިން ރާއްޖެ އައިސްފައިވާއިރު 2023 ވަނަ އަހަރު އައިސްފައިވަނީ 1.87 މިލިއަން ފަތުރުވެރިންނެވެ. މިއަހަރު އެވަރެޖްކޮށް 6،000 ފަތުރުވެރިން ރާއްޖެ ޒިޔާރަތްކުރެ އެވެ.
ރާއްޖޭގެ ބެޑް ކެޕޭސިޓީ މިވަގުތު އުޅެނީ 63،093 ގަ އެވެ. އޭގެ ތެރެއިން 44،323 އަކީ ރިސޯޓް ބެޑް ކެޕޭސިޓީ އެވެ. އަދި 16،172 ގެސްޓްހައުސްއަށް ދާއިރު ބާކީ 2،598 އަކީ ހޮޓެލް ބެޑްސް އެވެ.
ސަރުކާރުގެ އަމާޒު ކަމަށްވާ 2.2 މިލިއަން ފަތުރުވެރިން ރާއްޖެ އަންނާނެ ކަމަށް މިހާރު މިވަނީ ވަރަށް ބޮޑަށް ޔަގީންވެފަ އެވެ. ސަރުކާރުގެ އަންނަ އަހަރުގެ އަންދާޒާ އަކީ 2.4 މިލިއަން ފަތުރުވެރިންނެވެ.
