ރާޢްޖޭގެ ފަތުރުވެރިކަން ސިނާއަތް އިތުރަށް ވަރުގަދަ ކުރުމުުގެ އަޒުމުގައި ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން އެ ސިނާއަތުގައި ހަރަކާތްތެރުވާ ފަރާތްތަކަށް އަމާޒުކޮށްގެން އެންގޭޖްމެންޓް ސެޝަންތަކެއް ކުރިއަށް ގެންދިއުމަށް ނިންމައިފި އެވެ.
މި ސެޝަންތަކުގެ މައިގަނޑު މަގްސަދަކީ ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކުގެ ސީދާ ބައިވެރިވުމާއެކު ކުރިއަށް ރާވާ ހިންގުމަށް ކަނޑައަޅާ މަސައްކަތްތަކާއި ކެމްޕޭނުތަކާއި އަމާޒުތައް ބައްޓަންކުރުމެވެ.
މި ސެޝަންތައް ކުރިއަށް އޮތް ހަފްތާގައި ފެށުމަށް ހަމަޖެހިފައިވާއިރު މީގެ ސަބަބުން މި ސިނާއަތުގެ ހިއްސާދަރުންނާއި ބައިވެރިން އަދި ތަޖުރިބާކާރުންގެ މެދުގައި މުހިންމު އެތަކެއް މަޝްވަރާތަކެއް ކުރެވި ކުރިއަށް އޮތް އަހަރުގައި ރާއްޖެ އިޝްތިހާރުކުރުމުގައި ސިނާއަތުގެ ބައިވެރިންގެ ލަފާތައް އެއްކުރެވި ކަންކަން ރޭވުމަށް ފަސޭހަވެ މަގުފަހިވެގެންދާނެ އެވެ.
މިފަދަ އެންގޭޖްމެންޓް ސެޝަންތައް ކުރިއަށް ގެންދިއުމުގެ އެންމެ މުހިންމު އެއް ބޭނުމަކީ މުހިންމު ކަންކަން ނިންމުމުގައި ވިޒިޓް މޯލްޑިވްސް ކޯޕަރޭޝަނަށް އިރުޝާދު ދޭނެ އެޑްވައިޒަރީ ބޯޑެއް ނުވަތަ ކޮމިޓީއެއް އެކުލަވާލުމެވެ. މި ކޮމެޓީން ޑިޖިޓަލް ޓްރާންސްފޮމޭޝަންތަކާއި، މާކެޓިން އަދި ތަފާސް ހިސާބުގެ އަލީގައި ކަންކަން ނިންމުމާއި ފަތުރުވެރިކަމުގެ ސިނާއަތުގެ މާކެޓް ފުޅާކޮށް ސިންދަފާތުކުރުމުގރ އިތުރުން އުފެއްދުންދެރިކަން އިތުރުކުރުން ފަދަ ކަންކަމުގައި މި ކޯޕަރޭޝަނަށް ލަފާދޭނެ އެވެ.
މި ކޯޕަރޭޝަނުން އަންނަނީ ފަތުރުވެރިކަމުގެ ސިނާއަތުގެ ހިއްސާދާރުން ބައިވެރިކޮށް އަންނަ އަހަރުގެ ކުއާޓާތައް މުރާޖާކުރުމަށް ހާއްސަ ސެޝަންތަކެއް އިންތިޒާމުކުރުމަށް ވެސް ރާވަމުންނެވެ. މީގެ ސަބަބުން މެންބަރުންގެ ބައިވެރިވުން އިތުރުވެ، ހުޅުވާލެވިގެން ހިޔާލުތައް ދެވޭނެ ފުރުސަތު ފަހިވާނެ އެވެ.
މި ސެޝަންތަކުގައި ބައިވެރިވުމަށް އެދޭ ފޯމު ތިރީގައި އެވަނީ އެވެ.
