ދިވެހިރާއްޖެއަށް ފަތުރުވެރިން ޒިޔާރަތްކުރާ އަދަދަށް ބަލާއިރު މި ހިނގާ ނޮވެމްބަރު މަސް ނިމުމުގެ ކުރިން، ރާއްޖެއަށް ދެ މިލިއަން ފަތުރުވެރިން ހަމަވާނެ އެވެ.

ޓޫރިޒަމް މިނިސްޓްރީން އިއްޔެގެ ނިޔަލަށް ނެރެފައިވާ ތަފާސް ހިސާބުތަކުން ދައްކާ ގޮތުގައި، މި އަހަރުގެ މިހާތަނަށް ރާއްޖެއަށް 1,969,726 ފަތުރުވެރިން ވަނީ ޒިޔާރަތްކޮށްފަ އެވެ. އެހެންކަމުން ދެމިލިއަން ފަތުރުވެރިން ހަމަކުރުމަށް ދެން ބޭނުންވާނީ ބާކީ 30,274 ފަތުރުވެރިންނެވެ. ރާއްޖެއަށް މިހާރު ފަތުރުވެރިން ޒިޔާރަތްކުރާ އަދަދަށް ބަލާއިރު މި އަދަދު މި މަސް ނިމުމުގެ ކުރިން ހަމަކުރެވޭނެ ކަމަށް ލަފާކުރެވެ އެވެ.

ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާ ގޮތުގައި، ނިމިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 1,790,268 ފަތުރުވެރިންނެވެ. މިއީ 179,458 ޓޫރިސްޓުން އިތުރުވުމެކެވެ. މިހާރު ރާއްޖެއަށް އެވްރެޖު ގޮތެއްގައި ޒިޔާރަތްކުރަނީ 6,042 ފަތުރުވެރިންނެވެ.

މި މަހު ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރީ ޗައިނާއިންނެވެ. ޗައިނާއިން 307,722 ފަތުރުވެރިން ރާއްޖެއާށް ޒިޔާރަތްކޮށްފައިވެ އެވެ. ލިސްޓުގެ ދެވަނައިގައި އޮތީ ރަޝިޔާ އެވެ. ރަޝިޔާއިން 248,308 ފަތުރުވެރިން ވަނީ ރާއްޖެއަށް ޒިޔާރަތްކޮށްފަ އެވެ.

ތިންވަނައިގައި އޮތީ އިނގިރޭސި ވިލާތެވެ. އެ ގައުމުން 175،874 ފަތުރުވެރިން ވަނީ ރާއްޖެއަށް ޒިޔާރަތްކޮށްފަ އެވެ.

ސަރުކާރުގެ އަމާޒަކީ މިއަހަރު ނިމުމުގެ ކުރިން 2.2 މިލިއަން ފަތުރުވެރިން ރާއްޖެ ގެނައުމެވެ.