ރާއްޖޭގައި ގާއިމުކުރާ ދެވަނަ ވަގުފް އިމާރާތް، ދާރުލް އަރްގަމްގެ ބިންގާ އަޅައިފި އެވެ.

ދާރުލް އަރްގަމްގެ ބިންގާ އެޅުމުގެ ރަސްމިއްޔާތު މިއަދު މެންދުރުފަހު ބާއްވާފައިވާއިރު މި ރަސްމިއްޔާތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައިވެރިވެ ވަޑައިގެންނެވި އެވެ.

ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑް (އާރުސީސީ)އާއި ހަވާލުކޮށްގެން އިމާރަތްކުރާ މި އިމާރާތުގެ ބިންގާ އަޅުއްވައިދެއްވީ، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި، އާރުސީސީގެ ޑެޕިއުޓީ މެނޭޖިން ޑިރެކްޓަރު އާދަމް ރަހީމެވެ. މި މަޝްރޫއަކީ، ބީއެމްއެލް އިސްލާމިކްގެ އިސްލާމިކް ފައިނޭންސިންގެ ފެސިލިޓީގެ ދަށުން ކުރިއަށްގެންދާ، 39.4 މިލިޔަން ރުފިޔާގެ މަޝްރޫއެކެވެ.

ޖުމުލަ 12 ފަންގިފިލާ ހިމެނޭ މި އިމާރާތުން އަހަރަކު ގާތްގަނޑަކަށް 10 މިލިއަން ރުފިޔާގެ އާމްދަނީއެއް ލިބޭނޭކަމަށް އިސްލާމިކް މިނިސްޓްރީން އަންދާޒާކުރެ އެވެ. މީގެ އިތުރުން ހުޅުމާލޭގައިވެސް ވަގުފް އިމާރާތެއް ބިނާކުރުމަށް ވަނީ ހަމަޖެހިފަ އެވެ.

މާލޭ ސަރަހައްދުގެ އިތުރުން ސަރުކާރުން ވަނީ އައްޑޫ ސިޓީ، ފުވައްމުލައް ސިޓީ، ތިނަދޫ ސިޓީ، ކުޅުދުއްފުށި ސިޓީގެ އިތުރުން ގއ. ވިލިނގިލީގައި ވެސް ވަގުފްގެ މަޝްރޫއުތައް ހިންގުމަށް ނިންމައިފަ އެވެ. އެ މަޝްރޫއަކީ ރައީސް މުއިއްޒުގެ ރިޔާސީ ވައުދާ އެއްގޮތަށް ރާއްޖޭގައި ވަގުފް ފަންޑް އިތުރަށް ފުޅާކޮށް، އިސްލާމީ ދާއިރާއަށް މާލީ މަންފާ ލިބޭނެ ވަސީލަތްތައް އިތުރު ކުރުމުގެ ގޮތުން ކުރިއަށް ގެންދާ މަޝްރޫއުތަކެކެވެ.