2027 ވަނަ އަހަރު ސައުދީ އަރަބިއާގައި އޮންނަ އޭޝިއަން ކަޕުގެ ކޮލިފިކޭޝަނުގައި ދިވެހިރާއްޖެ އަތުން ފިލިޕީންސް މޮޅުވެ ގްރޫޕް ފަހު މެޗުގެ ފޯރި ގަދަވެއްޖެ އެވެ.

ރަށުން ބޭރުގައި 0-2 ގެ ނަތީޖާއިން ފްލިޕީންސް މޮޅުވެފައިވާއިރު އެ ޓީމަށް މިވަނީ 13 ޕޮއިންޓު ލިބިފަ އެވެ. އަދި ޓީމޯ-ލެސްޓޭ އަތުން 0-5 ގެ ނަތީޖާއިން މޮޅުވެ 13 ޕޮއިންޓާއެކު ނަމަވެސް ގޯލުގެ ތަފާތުން އެއްވަނައިގައި އޮތީ ތަޖިކިސްތާނެވެ.

ގްރޫޕް ސްޓެޖުގެ ފަހު މެޗު އަންނަ މާޗު މަހުގެ 31 ވަނަ ދުވަހު އޮންނައިރު މި މެޗު ކުޅޭނީ ތަޖިކިސްތާނުގަ އެވެ. ގްރޫޕް ސްޓޭޖުގައި މި ދެޓީމު ކުޅުނު ފުރަތަމަ މެޗު 2-2 އިން ވަނީ އެއްވަރުވެފަ އެވެ.

މުބާރާތުގެ އުސޫލުގައިވާ ގޮތުން އެއްވަރަށް ޕޮއިންޓް ލިބިފައިވާނަމަ ދެން ބަލާނީ ހެޑް-ޓު-ހެޑް އަށެވެ. މާނައަކީ ދެ ޓީމު ބައްދަލުކުރި މެޗު ތަކުގެ ތެރެއިން މޮޅުވެފައިވާ ޓީމެވެ. އަދި ދެ މެޗު ވެސް އެއްވަރުވެއްޖެ ނަމަ ދެން ބަލާނީ ގޯލުގެ ގޮތުން ކުރީގައި އޮތް ޓީމެކެވެ. އެހެންކަމުން މި މެޗު އެއްވަރުވެއްޖެ ނަމަ އެއްވަނަ ލިބޭނީ މިވަގުތު އެއް ގޯލު ކުރީގައި އޮތް ތަޖިކިސްތާނަށެވެ. އަދި މި މެޗުން މޮޅުވާން ފިލިޕީންސް އަށް މަޖުބޫރެވެ. 2027 ވަނަ އަހަރު އޮންނަ އޭޝިއަން ކަޕަށް ކޮލިފައި ވާނީ ގްރޫޕުން އެއްވަނަ ހޯދާ ޓީމުތައް އެކަންޏެވެ.

ރާއްޖެ ދަނޑުގައި އަންގާރަ ދުވަހުގެ ހަވީރު ކުޅުނު މެޗުގައި ދެ ގޯލުވެސް ފްލިޕީންސް އިން ޖަހާފައިވަނީ ފުރަތަމަ ހާފުގަ އެވެ.

މިހާތަނަށް ރާއްޖެ-ފިލިޕީންސް ޖުމްލަ ހަތް ފަހަރު ވާދަކޮށްފައިވާއިރު ރާއްޖެ މޮޅުވެފައިވަނީ އެންމެ ފަހަރެއްގަ އެވެ. އެއީ 2009 ވަނަ އަރު އޭއެފްސީ ޗެލެންޖް ކަޕުގައި މާލޭގައި ކުޅުނު މެޗު 2-3 ގެ ނަތީޖާ އިންނެެވެ. އެއީ އެންމެ ފުރަތަމަ ކުރިމަތިލުމެވެ. އޭގެ ފަހުން ފަސް މެޗު ފިލިޕީންސް މޮޅުވެފައިވާއިރު އެއް މެޗު އެއްވަރުވެފައިވެ އެވެ.

މި ގްރޫޕުގައި ރާއްޖެ ފުލުގައި އޮތީ މިހާތަނަށް ކުޅުނު ހުރިހާ މެޗަކުން ބަލިވެގެންނެވެ. ފަހު މެޗުގައި ރާއްޖެ ވާދަކުރާނީ ޓީމޯ-ލެސްޓޭއާ އެވެ.