މިދިޔަ އޮކްޓޫބަރު މަހު 3 ވަނަ ދުވަހު ރާއްޖޭގެ އެކި ކަންކޮޅުތަކުން މީހުން ގެނެސް މުޒާހަރާގެ ނަމުގައި މާލެތެރެ ހަލަބޮލިކޮށްލަން މަސައްކަތް ކުރި އެމްޑީޕީގެ އެއްވުމުގައި ހައްޔަރުކުރި މީހުންނަށް ދައުވާ ނުކުރުމަށް ޕީޖީ އޮފީހުން ނިންމައިފި އެވެ.
މި މައްސަލައާ ގުޅިގެން ގާނޫނު ތަންފީޒުކުރާ މުވައްޒަފެއްގެ މަސައްކަތައް ގަސްތުގައި ހުރަސް އެޅުމާއި، ގާނޫނު ހިންގުމަށް ހުރަސް އެޅުމުގެ ދައުވާގައި ހަތް މީހަކަށް ދައުވާކޮށްދިނުމަށް ފުލުހުންގެ ފަރާތުން ޕީޖީގައި އެދިފައިވެ އެވެ. އެ ފަރާތްތަކަކީ؛
- ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ
- ކުޅުދުއްފުށި އުތުރު ދާއިރާގެ ކުރީގެ މެންބަރު ޔާސިރު އަބްދުއްލަތީފު
- މާފުށި ކައުންސިލް ރައީސް ހަސަން ސޮލާހު
- ހުސައިން ޝާކިރު
- އަލީ ޖުމާން
- އަޒީމް އަލީ
- މުހައްމަދު ހަލަފް އިބްރާހިމް
ޕީޖީ އޮފީހުން ބުނެފައިވަނީ އެ ފަރާތްތަކަށް ދައުވާ ނުކުރުމަށް އެ އޮފީހުން ނިންމީ މުޒާހަރާ ކުރުމަކީ ކޮންމެ މީހަކަށް ވެސް ލިބިފައިވާ އަސާސީ ހައްގެއް ކަމަށާއި، މުޒާހަރާގައި އެއްވެސް މީހަކަށް އަނިޔާއެއް އަދި އެއްވެސް މުދަލަކަށް ގެއްލުން ދީފައި ނުވާތީ ކަމަށެވެ.
އެއްވުމުގެ ތެރެއިން މި ހަތް މީހުން ހައްޔަރުކުރުމަށްފަހު ފުލުހުން ނެރުނު ބަޔާނުގައި ބުނެފައިވަނީ އެ ފަރާތްތައް ހައްޔަރުކޮށްފައިވަނީ މުޒާހަރާގައި ބޭނުން ކުރުމަށް ފުލުހުން ހުއްދަ ދީފައިވާ ރޫޓް ނޫން އެހެން ރޫޓެއް ބޭނުންކުރުމަށް މުޒާހަރާގެ ބައިވެރިން މަސައްކަތް ކޮށްފައިވާ ކަމަށާއި، އަދި ފުލުހުން ބޭނުންކުރާ އާލަތްތައް އަތުލަން މަސައްކަތްކޮށް ފުލުހުންނަށް އަނިޔާ ކުރަން މަސައްކަތްކޮށްފައިވާތީ ކަމަށެވެ.
މި މުޒާހަރާއާ ގުޅިގެން އިތުރު 10 މީހެއްގެ މައްސަލަ ފުލުހުން ބަލަމުންދާއިރު ތަހުގީގުގެ ބައި ނިމުމުން ދައުވާ ކުރުމާމެދު ގޮތެއް ނިންމާނެ ކަމަށް ފުލުހުން ބުނެފައިވެ އެވެ.
