އެމެރިކާގެ ރައީސް ޑޮނަލްޑް ޓްރަމްޕްގެ "ދަ ޓްރަމްޕް އޯގަނައިޒޭޝަން" އިން ރާއްޖޭގައި ލަގްޒަރީ ރިސޯޓެއް ހުޅުވުމުގެ މަސައްކަތް ފަށާފައިވާކަން އިއުކާނުކޮށްފި އެވެ.
ބްލޫމްބާގުން ރިޕޯޓުކޮށްފައިވާ ގޮތުގައި ޓްރަމްޕް އޯގަނައިޒޭޝަނުން އެތަނުގެ ސައުދީ އަރަބިއްޔާގެ ބިޒްނަސް ޕާޓްނަރާ އެކު، ރާއްޖޭގައި ލަގްޒަރީ ރިސޯޓެއް ހެދުމުގެ ޕްލޭންތައް ވަނީ ފަށައިފަ އެވެ. އަދި އެ ރިސޯޓް ހެދުމުގެ ޕްރޮޖެކްޓް "ޓޯކަނައިޒްކުރުމަށް" ނުވަތަ ކްރިޕްޓޯ އަދި ބްލޮކްޗެއިން އިންވެސްޓަރުންނަށް ހާއްސަކޮށް އެ ޕްރޮޖެކްޓުގައި ބައިވެރިވެވޭ ގޮތަށް ހަދަން ވެސް ރާވާފައިވާ ކަމަށް އެ ނޫހުގައި ބުންޏެވެ.
"ޓްރަމްޕް އިންޓަނޭޝަނަލް ހޮޓެލް މޯލްޑިވްސް"ގެ ނަން ދޭ އެ ރިސޯޓުގައި 80 އަލްޓްރާ-ލަގްޒަރީ ބީޗް ވިލާ އާއި ވޯޓާ ވިލާ ހުންނާނެ ކަމަށާއި އެ ރިސޯޓުގެ މަސައްކަތް ކުރާނީ ލަންޑަންގައި ލިސްޓުކޮށްފައިވާ ރިއަލް-އެސްޓޭޓް ކުންފުންޏެއް ކަމަށްވާ ދާރް ގްލޯބަލް ޕީއެލްސީން ކަމަށް، އެ ކުންފުންޏާއި ޓްރަމްޕް އޯގަނައިޒޭޝަން ގުޅިގެން ނެރުނު ނޫސްބަޔާނަކާ ހަވާލާދީ ބްލޫމްބާގުގައި ބުންޏެވެ.
އެ ބަޔާނުގައި ބުނި ގޮތުގައި، މިއީ ޓޯކަނައިޒްޑް ޕްރޮޕަޓީއެއްގެ ގޮތުގައި މުޅި ދުނިޔޭގައި ވެސް ހިންގާ ފުރަތަމަ ރިސޯޓް ޕްރޮޖެކްޓެވެ.
މި ޕްރޮޖެކްޓަކީ ޓްރަމްޕްގެ ނަމުގައި ޓްރަމްޕް އޯގަނައިޒޭޝަނާއި ދާރް ގްލޯބަލް އިން މިހާރު ހިންގަމުން އަންނަ އެކި ޕްރޮޖެކްޓުތަކަށް އިތުރުވާ މަސައްކަތެކެވެ. އެ ދެ ކުންފުނި ގުޅިގެން ގަލްފުގެ ގައުމުތައް ކަމަށްވާ ޔޫއޭއީ އާއި ސައުދީ އާއި އޮމާން އަދި ގަތަރުގައި އެ ބްރޭންޑުގެ ޕްރޮޖެކްޓުތައް ވަނީ ފަށައިފަ އެވެ.
ސައުދީގެ ވެރިރަށް ޖިއްދާ އާއި ޔޫއޭއީގެ ދުބާއީގައި ޓްރަމްޕް ޓަވަރު އަޅަމުން އަންނައިރު، ގަތަރާއި އޮމާންގައި ރިސޯޓްތަކާއި ލަގްޒަރީ ގެތަކާއި ގޮލްފް ކޯސްތައް ހެދުމުގެ މަސައްކަތް އަންނަނީ ދާރް ގްލޯބަލް މެދުވެރިކޮށް ޓްރަމްޕް އޯގަނައިޒޭޝަނުން އަންނަނީ ކުރަމުންނެވެ.
ސައުދީގެ ވަލީ އަހުދު މުހައްމަދު ބިން ސަލްމާން މިއަދު ވަނީ ރަސްމީ ދަތުރެއްގައި އެމެރިކާއަށް ވަޑައިގެންފަ އެވެ. އަދި ސަލްމާން މިއަދު ޓްރަމްޕްއާ ބައްދަލުކުރައްވައި، ދެ ގައުމުގެ ދެމެދުގައި ގުޅުންތައް ހަރުދަނާކުރުމަށް ރަސްމީ މަޝްވަރާ ކުރައްވާނެ ކަމަށް ވެސް ރިޕޯޓްތައް ބުންޏެވެ.
