ފަލަސްޠީނަކަށް ބައިނަލްއަޤްވާމީ ފޯސް އެއް ބޭނުމެއް ނުވެއެވެ. ފަލަސްޠީނަށް ބޭނުން ވަނީ އެ މީހުންގެ އަމިއްލަ ފަސްގަނޑުގައި ހަމަޖެހިގެން ދިރިއުޅެވޭނެ ގޮތެކެވެ. ފަލަސްޠީނަށް އަރައިގެން އުޅެނީ ބައިނަލްއަޤްވާމީ އޭ ކިޔާ ބާރުތަކުގެ ހިޔަނީގައި ޒައެނިސްޓުންނެވެ. ޣައްޒާ ސުންނާފަތިކޮށްލި އިރު ބައިނަލްއަޤްވާމީ އެއްވެސް ބާރަކުން ޣައްޒާ ޙިމާޔަތް ކުރާކަށް ނުދިޔައެވެ. މުޖުރިމު ނަތަންޔާހޫ ހައްޔަރެއް ވެސް ނުކުރިއެވެ.
އެމެރިކާއިން އދ. ގެ ސަލާމަތީ މަޖިލީހަށް ހުށަހެޅި ޣައްޒާ ހަނގުރާމަ އާއި ގުޅޭ ޤަރާރަށް ރަޝިޔާ އާއި ޗައިނާ އިން ވޯޓު ނުދިން އިރު ވީޓޯ އެއްވެސް ނުކުރިއެވެ. އެއާއި އެކު 0-13 ވޯޓައި އެކު ޤަރާރު ފާސްވެ، ޙަމާސްގެ ހަތިޔާރުތައް ނައްތާލައި، ޙަމާސް ރޫޅާލުމަށް “އިންޓަނޭޝަނަލް ސްޓެބިލައިޒޭޝަން ފޯސް” (އައިއެސްއެފް) ގެ ނަމުގައި ފަލަސްޠީނަށް ފޯސް އެއް އަރާނެއެވެ.
މި ވޯޓުގައި މޮސްކޯ އާއި ބެއިޖިން އިން ބައިވެރި ނުވީ ސަލާމަތީ ކަންކަން ބެލެހެއްޓުމަށް ފަލަސްޠީނަށް ފޮނުވާ ފައުޖަށް ފަހު ފަލަސްޠީނުގެ ރައްޔިތުންގެ މުސްތަޤްބަލާއި ގުޅޭ ތަފްޞީލުތައް ހިމަނާފައި ނުވާތީއެވެ. މީގެ އިތުރުން ފަލަސްޠީނުގެ މިނިވަން ދައުލަތެއް ޤާއިމް ކުރުމަށް ގަބޫލުކުރެވޭ ގޮތްތަކާއި އުޞޫލުތަކެއް ވެސް އެމެރިކާގެ ކަރުދާހުގައި ބަޔާން ކޮށްފައި ނުވާތީއެވެ.
މި ވޯޓުގެ ކުރިން ރަޝިޔާ ސަރުކާރުން ވަނީ ލިޔުމެއް ވެސް ބަހާފައެވެ. އެ ލިޔުމުގައި، އދ.ގެ ސަލާމަތީ މަޖިލީހުން ދެދައުލަތުގެ ހައްލަކަށް މަސައްކަތް ކުރަން ޖެހޭ ކަމަށް ބުނެފައި ވެއެވެ. މޮސްކޯއިން ދައުރުކުރި ލިޔުމުގައި ފަލަސްޠީނުގެ އޮތޯރިޓީގެ ދަށުން ހުޅަނގު އައްސޭރި އާއި ޣައްޒާ އަކީ އެއްބައެއްގެ ގޮތުގައި ހެދުމުގެ މުހިއްމުކަން ފާހަގަ ކޮށްފައި ވާއިރު، ރަޝިޔާގެ ފޮރިން މިނިސްޓަރު ސާގޭ ލަވްރޯވް ވަނީ ޣައްޒާގެ ކަންކަމުގައި ޓްރަމްޕް ގެންގުޅޭ ޕްލޭނަށް ފާޑު ވެސް ވިދާޅުވެފައެވެ.
އަނެއްކޮޅުން ޗައިނާއިން ވެސް މިފަދަ ކަންބޮޑުވުންތައް ފާހަގަ ކޮށްފައި ވެއެވެ. އެމެރިކާގެ ޤަރާރުގައި ފަލަސްޠީނުގެ ރައްޔިތުންގެ އަމިއްލަ ނިންމުމެއް ނިންމުމަށް މި ވަގުތު ފުރުޞަތު ނުދީ އަދި އެ ކަން ވާނެ ކަމުގެ އެކަށީގެންވާ ޔަޤީންކަމެއް ވެސް ނެތް ކަމަށް ޗައިނާ އިން ބުނެއެވެ. މީގެ އިތުރުން 2027 ވަނަ އަހަރާއި ހަމަޔަށް އައިއެސްއެފް ގެ ސިފައިން ފަލަސްޠިނުގެ ބިމުގައި ތިބޭއިރު، އެއަށް ފަހު ފަލަސްޠީނުގައި ސިޔާސީ ކަންކަން ދާނެ ގޮތެއް ނުވަތަ ވެރިކަން ހިންގާނެ ގޮތެއް ސާފުކޮށް ބަޔާންކޮށްފައި ނުވާ ކަމަށާއި، ޤާނޫނީ އޮނިގަނޑުތައް ފާހަގަކޮށްފައި ނުވާ ކަމަށް ވެސް ޗައިނާ އިން ބުނެއެވެ.
އެމެރިކާގެ ޤަރާރަށް ބެއިޖިން އާއި މޮސްކޯގެ މަންދޫބުން ފާޑު ވިދާޅުވި ނަމަވެސް ވީޓޯ އެއް ނުކުރިއެވެ. ވަރަށް އިތުބާރު ހުރި މަސްދަރަކުން ބުނާ ގޮތުގައި މި ޤަރާރު ވީޓޯ ނުކުރުމަށް ނަތަންޔާހޫ ވަނީ އިއްޔެރޭ ރަޝިޔާގެ ރައީސް ވްލަޑިމީރު ޕޫޓިން އަށް ފޯނުކޮށް، މަޝްވަރާ ވެސް ކޮށްފައެވެ. ޗައިނާ އާއި އެކު މަޝްވަރާ ކުރި ކަމެއް އަދި އެނގޭކަށް ނެތެވެ.
ކޮންމެޔަކަސް، އެމެރިކާއިން ވަނީ މި ޤަރާރަކީ ތާރީޚި އަދި ވަރަށް ކާމިޔާބު ޤަރާރެއްގެ ގޮތުގައި ފާހަގަކޮށް، އައިއެސްއެފްގެ އެހީގައި ޣައްޒާގައި އައު ސަރުކާރެއް ހަދައި ޣައްޒާ އަކީ އިސްރާއީލަށް ނުރައްކާތެރި ތަނެއްގެ ގޮތުގައި އޮތްއޮތުން ނިމުމަކަށް ގެނެވޭނެ ކަމަށް ބުނެފައެވެ.
އެކަމަކު ރަޝިޔާ އާއި ޗައިނާއިން ބުނަނީ ފަލަސްޠީނުގެ މިނިވަންކަމާ ބެހޭ ސާފު ތަފްޞީލެއް ނެތި، މި ޕްލޭންގެ ސަބަބުން މައްސަލަތައް ހައްލު ކުރުމަށް ވުރެ އިތުރަށް މައްސަލަތައް އުފެދުމުގެ ނުރައްކާ އޮތް ކަމަށެވެ.
ދެން އޮތީ ބޮޑު ސުވާލާއި އޭގެ ޖަވާބެވެ. މި އުޅެނީ ފަލަސްޠީނުގައި މިނިވަން ދައުލަތެއް ޤާއިމް ކުރުމަށް ހެއްޔެވެ؟ ޖަވާބަކީ “ނުނެކެވެ”، މި އުޅެނީ “އިސްތިޢުމާރު” ކުރާށެވެ!
