ޖެނުއަރީން ފެށިގެން ނަފްސާނީ ބަލިތަކުގެ ހުރިހާ ފަރުވާއެއް އާސަންދައިން ކަވަރުކުރާނެ

މުހައްމަދު ޖަމްޝަތު | 12 ދުވަސް ކުރިން - 18 ނޮވެންބަރު 2025 10:41
އާސަންދަ ކޮމްޕެނީގެ އޮފީސް---
އާސަންދަ ކޮމްޕެނީގެ އޮފީސް---
ޚުލާސާ

ރައީސް ވިދާޅުވީ އަންނަ އަހަރު އެންމެ ބޮޑު އިސްކަމެއް ދޭނީ ސިއްހީ ދާއިރާ ތަރައްގީކުރުމަށް ކަމަށް

އަންނަ އަހަރުގެ ޖެނުއަރީމަހުން ފެށިގެން ނަފްސާނީ ބަލިތަކަށް ހިނގާ ހުރިހާ ހަރަދެއް އާސަންދައިގެ ތެރެއިން ހަމަޖެހޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރާއްޖޭގައި ނަފްސާނީ ބަލި ތަހައްމަލުކުރާ މީހުން ނިސްބަތުން ގިނަ ނަމަވެސް އެފަދަ ބަލިތަކުގެ ފަރުވާއަށް ކުރާ ހަރަދުގެ ތެރެއިން އާސަންދަ ކަވަރުކުރަނީ ވަކި އިންސައްތަ އެކެވެ.

ސަރުކާރަށް ދެ އަހަރު ފުރުމުގެ މުނާސަބަތުގައި މިރޭ ސޯޝަލް ސެންޓަރުގައި ބޭއްވި ޖަލްސާގައި ވާހަކަ ދައްކަވަމުން ރައީސް ވިދާޅުވީ ނަފްސާނީ ބަލި ހުންނަ ފަރާތްތަކަށް ފޯރުކޮށްދޭ ފަރުވާގައި އާސަންދައިން ވަކި އިންސައްތައެއް ކަވަރު ކުރުމަކީ ހަމަޖެހޭ ގޮތެއް ނޫންކަމަށެވެ.

"މިއަދާ ހަމައަށް ވެސް ނަފުސާނީ ބައްޔަށް ކުރާ ހަރަދު އާސަންދަ އިން އެއްކޮށް ކަވާއެއް ނުވޭ. އަޅުގަނޑުމެން އެންމެން ހައިރާންވެފައި މި ތިބީ އެކަމުގައި. އެކަން ނިމުމަކަށް ގެނެސް އެކެއް ޖެނުއަރީން ފެށިގެން ނަފްސާނީ ބައްޔަށް ކުރާ ހުރިހާ ހަރަދެއް އާސަންދައިން ކަވާ ވާނެ،" ރައީސް ވިދާޅުވި އެވެ.

ތަފާސް ހިސާބުތައް ދައްކާ ގޮތުން މިދިޔަ އަހަރު އާސަންދައިން 2.4 މިލިއަނަށްވުރެ ގިނަ ރުފިޔާ ވަނީ ހޭދަކޮށްފަ އެވެ. 2023 ވަނަ އަހަރު އެ ސްކީމުން ހަރަދުކުރި އަދަދު 2.2 މިލިއަނަށްވުރެ ގިނަ އެވެ.

ރައީސް ފާހަގަކުރެއްވި ގޮތުގައި އަންނަ އަހަރު އެންމެ ބޮޑު އިސްކަމެއް ދޭނީ ސިއްހީ ދާއިރާ ތަރައްގީ ކުރުމަށެވެ. އެކަމަށް އަންނަ އަހަރަށް ލަފާ ކުރާ ބަޖެޓްގައި ވެސް ހާއްސަ އިސްކަމެއް ދީފައިވާ ކަމަށް ރައީސް ވިދާޅުވި އެވެ.

ރައީސް ވިދާޅުވި ގޮތުގައި ކުރިއަށް އޮތް ހަ މަސް ދުވަހުގެ ތެރޭގައި 15 ރަށެއްގައި ސީޓީ ސްކޭން ހިދުމަތް ގާއިމް ކުރާނެ އެވެ. އަދި ޓާޝަރީ ހޮސްޕިޓަލްތަކުގެ ތެރެއިން އެމްއާރުއައިގެ ހިދުމަތް ނެތް ހޮސްޕިޓަލްތަކުގައި އެކަން ވެސް ފަށާނެކަން ރައީސް އިއުލާން ކުރެއްވި އެވެ.

އެ މަނިކުފާނު ވިދާޅުވީ ރަށްރަށުގެ ސިއްހީ މަރުކަޒުތައް އެ ރަށެއްގެ ނިސްބަތުން ތަރައްގީކޮށް، ރަށުން ބޭރަށް ނުގޮސް ކޮންމެ ރަށެއްގައި ވެސް ތިބެގެން ލެބޯޓްރީ ޓެސްޓްތައް ހެދޭނެ މިންވަރަށް އެ ހިދުމަތް ފުޅާކޮށް މުވައްޒަފުން ހޯދާނެ ކަމަށެވެ.

އަދި ސީ އެމްބިއުލާންސްގެ ފްލީޓް އާ ކުރުމަށް ގެންނަ ފުރަތަމަ 10 ސީ އެމްބިއުލާންސް ހޯދުމަށް ސޮއިކުރުމުގެ މަސައްކަތް ކުރިއަށް ގެންދަވާ ކަމަށް ވެސް ރައީސް މުއިއްޒު ވިދާޅުވި އެވެ.

TelegramTwitterYoutubeTiktokViberFacebookInstagram

0 ރިއެކްޝަންސް / 0 ކޮމެންޓް

0%
0%
0%
0%
0%