ހުޅުމާލޭގައި އެކިއެކި ހަރަކާތްތައް ބޭއްވުމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ހުއްދަ ނުނަގައި، އެ ހަރަކާތްތަކަށް ސްޓޯލްތައް ވިއްކަމުންދާތީ އެކަމަށް ސަމާލުވުމަށް އެ ކޯޕަރޭޝަނުން މިއަދު އަނެއްކާވެސް އިލްތިމާސްކޮށްފި އެވެ. މިކަމުގެ ސަބަބުން ދިމާވެދާނެ މާލީ ގެއްލުންތަކުން ރައްކާތެރިވުމަށްޓަކައި، އިވެންޓުތަކަށް ސްޓޯލް ގަތުމުގެ ކުރިން ހުއްދަ އޮތްތޯ ޔަޤީންކުރުމަށް އެޗްޑީސީން ވަނީ ހަނދާންކޮށްފަ އެވެ.
އެޗްޑީސީއިން ނެރުނު އިއުލާނެއްގައި ބުނެފައިވަނީ، ހުޅުމާލޭގެ އެކި ސަރަޙައްދުތަކުގައި އިވެންޓުތައް ބޭއްވުމަށް އެޗްޑީސީގެ ފަރާތުން ނަގަންޖެހޭ ހުއްދަތައް ނެގުމަކާ ނުލައި، ބައެއް ފަރާތްތަކުން އިވެންޓުތައް ބޭއްވުމުގެ ނަމުގައި ސްޓޯލް ވިއްކަމުންދާކަން ފާހަގަކުރެވޭކަމަށެވެ. މިފަދަ ޢަމަލުތަކަކީ އެޗްޑީސީގެ ގަވާއިދުތަކާ ހިލާފު ކަންކަން ކަމަށާއި، މިކަމަށް ސަމާލުވުމަށް އެ ކޯޕަރޭޝަނުން ވަނީ އާންމުންނަށް ގޮވާލާފަ އެވެ.
އެޗްޑީސީއިން ބުނީ، އެއްވެސް ފަރާތަކުން ހުޅުމާލޭގައި ބާއްވާ އިވެންޓެއްގެ ސްޓޯލެއް ގަތުމުގެ ކުރިން އެ އިވެންޓެއް ރާވާ ފަރާތަކީ އެޗްޑީސީއިން އެކަމަށް ދޫކޮށްފައިވާ ހުއްދަ ލިބިފައިވާ ފަރާތެއްތޯ ޔަގީންކުރަންވާނެ ކަަމަށެވެ. އެގޮތުން، އެ ކޯޕަރޭޝަންގެ ޕާމިޓްސް އެންޑް ސާވިސަސް ސެކްޝަނާ ގުޅޭ ނަންބަރު 3356112 އަށް ގުޅައި، ހުއްދަ އޮތްކަން ޔަޤީންކުރުމަށްވެސް އެޗްޑީސީއިން ވަނީ އިލްތިމާސްކޮށްފަ އެވެ.
Advertisement
ހަމައެއާއެކު، އެޗްޑީސީގެ ހުއްދައެއް ނެތި، އެގޮތަށް އިވެންޓުތައް ހިންގުމުގެ ނަމުގައި ސްޓޯލްތައް ދޫކޮށް އަދި ގަތުމުގެ ސަބަބުން ލިބިދާނެ މާލީ ގެއްލުމަކަށް އެ ކޯޕަރޭޝަނުން ޒިންމާ ނުވާނެކަމަށްވެސް އެ ކޯޕަރޭޝަނުން ބުންޏެވެ. ވީމާ، ފައިސާގެ ގޮތުން ގެއްލުންވުމުގެ ފުރުސަތު ކުޑަކުރުމަށްޓަކައި މިކަމަށް ވަރަށް ބޮޑަށް ސަމާލުވުމަށް އެޗްޑީސީން ފާހަގަކުރި އެވެ.
އެގޮތުން މިދިޔަ ސެޕްޓެންބަރު މަހުވެސް އެޗްޑީސީން ވަނީ، އެ ކޯޕަރޭޝަނުގެ ހުއްދަ ނުނަގައި ހުޅުމާލޭގައި އިވެންޓުތައް ބާއްވަން ސްޓޯލްތައް ވިއްކުމުގެ މައްސަލަ ފެންމަތިވެފައިވާތީ، އެކަމަށް ސަމާލުވުމަށް އެދިފަ އެވެ. މިއަދު އަލުން މި އިލްތިމާސްކޮށްފައިވަނީ މިފަދަ ކަންކަން އަދިވެސް ހުއްޓިފައި ނުވާތީ ކަމަށް އެ ކޯޕަރޭޝަނުން ފާހަގަކޮށްފައިވެ އެވެ.
