އެމްޑީޕީ ތެރޭގައި ކޯޅުން އުފެދިފައިވާ މި ދަނޑިވަޅުގައި އާދަމް އާޒިމް މާލެ މޭޔަރުކަމަށް ވާދަކުރައްވާނެ ކަމަށް އިއުލާނުކޮށް ކެމްޕެއިން ފަށްޓަވާފައިވަނިކޮށް ރައީސް ނަޝީދުގެ ފަޅިން އަލީ އާޒިމް ޕްރައިމަރީއަށް ނެރުމަށް ނިންމަވައިފި އެވެ.
ރައީސް ނަޝީދު މިއަދު އެކްސްގައި އަލީ އާޒިމްގެ ފޮޓޯއެއް ޕޯސްޓުކޮށް ލިޔެފައިވަނީ "އަލީ އާޒިމް ފޯ މާލެ މޭޔަރު" މިހެންނެވެ. ނަމަވެސް އަލީ އާޒިމް ޕްރައިމަރީގައި ވާދަކުރައްވާނެ ކަމެއް ރަސްމީކޮށް އިއުލާނު ކުރައްވާފައެއް ނުވެ އެވެ.
އަލީ އާޒިމް އަކީ ރައީސް ސޯލިހުގެ ވެރިކަން ނިންމެވުމަށް އެމްޑީޕީން ވަކިވެވަޑައިގަތުމަށްފަހު ރައީސް ނަޝީދު އުފެއްދެވި "ދަ ޑިމެކްރެޓްސް" އާ ގުޅުމަށްފަހު މިއަހަރު ތެރޭ އެ ޕާޓީން ވެސް ވަކިވެވަޑައިގެން ރައީސް ނަޝީދުއާ އެކު އަލުން އެމްޑީޕީއާ ގުޅުނު މީހުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. ޑިމޮކްރެޓްސް ބޭފުޅުން އަލުން އެމްޑީޕީއާ ގުޅިވަޑައިގަތުމުން އެމްޑީޕީގެ ލީޑަޝިޕުގެ ތެރޭގައި ވަނީ ކޯޅުން އުފެދިފަ އެވެ. ހާއްސަކޮށް ސޯލިހު ފެކްޝަނުގެ ބޭފުޅުން އެކަމާ ނުރުހެ އެވެ. އެބޭފުޅުން ތުހުމަތު ކުރާ ގޮތުގައި ޑިމޮކްރެޓްސް ބޭފުޅުން އެމްޑީޕީއާ ގުޅުނީ ޗެއާޕާސަން ފައްޔާޒުއާ ޑީލެއްގެ ދަށުންނެވެ.
އެމްޑީޕީގެ ރިޔާސީ ޓިކެޓަށް އެމްޑީޕީގެ ގިނަ ލީޑަރުންތަކެއް ފޫގަޅާފައިވާއިރު އޭގެ ތެރޭގައި ކުރީގެ ދެ ރައީސުން ކަމަށްވާ އިބްރާހިމް ސޯލިހާއި، މުހައްމަދު ނަޝީދުގެ އިތުރުން މާލެ މޭޔަރު އާދަމް އާޒިމް، ފައްޔާޒު އިސްމާއިލް އަދި ހުޅުމާލެ ދެކުނު ދާއިރާގެ މެމްބަރު ޑރ. ޝަމްހީދު ވެސް ހިމެނެ އެވެ.
މައުލޫމާތު ލިބޭ ގޮތުގައި ރައީސް ސޯލިހު ބޭނުންފުޅު ވަނީ އާދަމް އާޒިމް އަށް މޭޔަރު ކަމުގެ ޓިކެޓު ދިނުމަށެވެ. އަދި އާދަމް އާޒިމް އެމަނިކުފާނުގެ ރަނިންމޭޓަކަށް ވުމަށެވެ.
މާލޭގެ މޭޔަރު ކަމަށް ވާދަކުރައްވާނެ ބޭފުޅަކު ސަރުކާރުގެ ހިންގާ ޕާޓީ ކަމަށްވާ ޕީއެންސީން އަދި ބޭފުޅަކު އިއުލާނުކުރައްވާފައެއް ނުވެ އެވެ.
