ރަޝިޔާގެ ސްޓޭޓް ނިއުކްލިއާ ކޯޕަރޭޝަން ރޮސަޓޮމް އާއި އިންޑިއާގެ އެޓޮމިކް އެނާޖީ އޮތޯރިޓީތަކުން ނިއުކްލިއާ ކޯޕަރޭޝަން ބޮޑުތަނުން ފުޅާކުރުމަށް އިޢުލާންކޮށްފި އެވެ.
ރޮސަޓޮމްގެ ޑިރެކްޓަރު ޖެނެރަލް އެލެކްސީ ލިޚަޗޭވް އާއި އިންޑިއާގެ ޑިޕާޓްމަންޓް އޮފް އެޓޮމިކް އެނާޖީގެ ޗެއާމަން އަޖިތު ކުމާރު ވަނީ ރަޝިޔާއިން ފަރުމާކޮށްފައިވާ ވީވީއީއާރު-1200 ޔުނިޓްތައް ހިމެނޭ ބޮޑު ނިއުކްލިއާ ޕްލާންޓެއް އެޅުމުގެ ޕްލޭން ވެސް ފައިނަލް ކޮށްފައެވެ.
ރަޝިޔާ އިން ބުނާ ގޮތުގައި ހައި ކެޕޭސިޓީ ޔުނިޓްތަކުގެ އިތުރުން ދެ ޤައުމުން ކުދި ރިއެކްޓަރުތައް ވެސް ތަރައްޤީ ކުރާނެއެވެ.
ހުޅަނގުގެ ދަތިކުރުމުގެ ފިޔަވަޅުތަކާއި ގުޅިގެން މޮސްކޯއިން ދަނީ އެމީހުންގެ ނިއުކްލިއާ މަސައްކަތް ފުޅާކުރުމަށް އެހެން ޤައުމުތަކާއި އެކު މަސައްކަތް ކުރަމުންނެވެ. ރަޝިޔާގެ އަމާޒަކީ ނިއުކްލިއާ ޕްލާންޓްތަކަށް އިންވެސްޓްކޮށްގެން އޭޝިޔާ ބައްރުގައި ވެސް ނުފޫޒު ވަރުގަދަ ކުރުމެވެ.
ރަޝިއާ އަކީ ދުނިޔޭގެ އެންމެ ބޮޑު ނިއުކްލިއާ ބާރެވެ. އޭޝިއާ، މެދުއިރުމަތި، އެފްރިކާ، އަދި ޔޫރަޕްގެ ބައެއް ޤައުމުތަކާއި އެކު ވެސް ނިއުކްލިއާ ހަކަތަ އުފެއްދުމުގެ މަޝްރޫއުތައް ރަޝިޔާ އިން ތަރައްގީ ކުރަމުން ދާއިރު ރޮސަޓޮމް މެދުވެރިކޮށް ރަޝިޔާއިން ދަނީ ތުރްކިޔޭ، ބަންގްލަދޭޝް، މިސްރު އަދި ޗައިނާގައި ނިއުކްލިއާ ޕްލާންޓްތައް ހަދަމުންނެވެ. މީގެ އިތުރުން ނިއުކްލިއާ އެއްބާރުލުން ފުޅާކުރުމަށް ދެކުނު އެފްރިކާ އާއި އާޖެންޓީނާ އާއި އެކުވެސް މޮސްކޯ އިން ދަނީ މަޝްވަރާ ކުރަމުންނެވެ.
