ބޭންކް އޮފް މޯލްޑިވްސް (ބީއެމްއެލް) އިން މި އަހަރުގެ ތެރޭގައި އަލަށް 6.5 ބިލިއަން ރުފިޔާގެ ލޯނު ދޫކޮށްފައިވާ ކަމަށް އެ ބޭންކުން ބުނެފި އެވެ. މިކަން ހާމަކޮށްފައިވަނީ، ރާއްޖޭގެ ބައެއް އަމިއްލަ ކުންފުނިތަކާއެކު ސަރުކާރުން ސޮއިކުރި މަޝްރޫއުތަކުގެ ކޮންޓްރެކްޓަރުންނަށް ބީއެމްއެލް އިން އެ ބޭންކުގެ ބޯޑުގެ ހުއްދައާ ނުލައި އަދި ލޯނު ދިނުމުގެ އުސޫލާ ހިލާފަށް ފައިސާ ދޫކުރަމުންދާ ކަމަށް ތުހުމަތުކޮށް ދައްކަމުންދާ ވާހަކަތައް ދޮގުކޮށް ބޭންކުން ނެރުނު ނޫސްބަޔާނެއްގަ އެވެ.
ބީއެމްއެލްއިން ނެރުނު ނޫސްބަޔާނުގައި ބުނެފައިވަނީ މި އަހަރުގެ ތިންވަނަ ކުއާޓަރު ނިމުނުއިރު ބޭންކުގެ ޖުމްލަ ލޯން ޕޯޓްފޯލިއޯ 23.7 ބިލިއަން ރުފިޔާއަށް އަރާ ކަމަށެވެ. އަދި މި އަހަރުތެރޭ އަލަށް 6.5 ބިލިއަން ރުފިޔާގެ ލޯނު ދޫކޮށްފައިވާކަމަށް ބީއެމްއެލްއިން ފާހަގަކުރި އެވެ.
ބޭންކުން ހާމަކުރިގޮތުގައި، މި އަހަރުގެ ސެޕްޓެމްބަރު މަހުގެ ނިޔަލަށް އެ ބޭންކުން ވަނީ އެކި ދާއިރާތަކަށް ގިނަ އަދަދެއްގެ ލޯނު ދޫކޮށްފައެވެ. އޭގެތެރޭގައި:
- ޓޫރިޒަމް ދާއިރާއަށް: 8.71 ބިލިއަން ރުފިޔާ
- އަމިއްލަ ފަރުދުންނަށް: 5.34 ބިލިއަން ރުފިޔާ
- އިމާރާތްކުރުމާއި ގެދޮރުވެރިކަމަށް: 5.09 ބިލިއަން ރުފިޔާ
- ދަތުރުފަތުރާއި ކޮމިއުނިކޭޝަނަށް: 2.40 ބިލިއަން ރުފިޔާ
- ވިޔަފާރިތަކަށް: 1.04 ބިލިއަން ރުފިޔާ
- އެހެނިހެން ދާއިރާތަކަށް: 1.11 ބިލިއަން ރުފިޔާ
ބީއެމްއެލްއިން ބުނީ، މި އަދަދުތަކުން އެކި ދާއިރާތަކަށް ބޭންކުގެ ރިސްކްތްރެޝްހޯލްޑް މިންގަނޑުގެ ތެރެއިން ލޯނު ދޫކުރަމުންދާކަން ހާމަވާ ކަމަށެވެ. މީގެ ބޭނުމަކީ ރާއްޖޭގެ އިޤްތިޞާދީ ތަރައްޤީއަށް ބޭންކުން ދެމުންދާ އެހީތެރިކަން އިތުރަށް ހާމަކުރުންކަމަށެވެ.
