ހުޅުމާލެ ތިންވަނަ ފިޔަވަހީގެ ބިން ހިއްކުމުގެ މަސައްކަތް އަލުން ފެށުމަށްޓަކައި، އެ ސަރަހައްދުގެ ފަޅު ހުސްކުރަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އަންގައިފި އެވެ.

މިކަމާ ގުޅިގެން އެޗްޑީސީއިން ނެރުނު އިއުލާނެއްގައި ބުނީ، މި މަސައްކަތް އަލުން ފެށުމަށްޓަކައި، އެ ސަރަހައްދުގައި މަސައްކަތް ކުރުމަށް ދަތިވާ ގޮތަށް އަޅާފައިހުރި އުޅަނދުތައް ނަގައި، ވަގުތީ ގޮތުން އެހެން ސަރަހައްދެއް އުޅަނދު އެޅުމަށް ހަމަޖައްސާފައިވާ ކަމަށެވެ.

އެޗްޑީސީއިން ނެރެފައިވާ އިއުލާނުގައި، މި މަސައްކަތްކުރާ ސަރަހައްދުގައި އަޅާފައިވާ އުޅަނދުތައް މިރޭ 00:00ގެ ކުރިން އެ ސަރަހައްދުން ނަގައި އުޅަނދުތައް ވަގުތީ ގޮތުން ބޭއްވުމަށް ހަމަޖައްސާފައި ސަރަހައްދުތަކުގައި ބޭއްވުމަށް ވަނީ އެދިފަ އެވެ.

އެގޮތުން މި އުޅަނދުތައް ބޭއްވުމަށް ގުޅިފަޅާއި، ކުޑަގިރި އަދި ތިލަފުށީ ފަޅުން ބައެއް އެޗްޑީސީއިން ވަނީ ކަނޑައަޅައިފަ އެވެ. އެ ރަށްރަށުގެ ފަޅުގައި އުޅަނދުތައް ބާއްވާނެ ސަރަހައްދުތަކުގެ ޗާޓުވެސް އެޗްޑީސީގެ އިއުލާނާ އެކު ވަނީ އާންމުކޮށްފަ އެވެ.

ހުޅުމާލެ ތިންވަނަ ފިޔަވަހީގެ ބިން ހިއްކަން ފެށުމަށް އެ ސަރަހައްދުގައި އަޅާފައިވާ އުޅަނދުތައް ނަގަން އެޗްޑީސީއިން މީގެކުރިންވެސް އިއުލާނުކޮށްފައިވާ ކަން ފާހަގަކޮށްލެވެ އެވެ.

އެޗްޑީސީއިން ވަނީ އާންމު ރައްޔިތުންނާއި އުޅަނދުތައް ގެންގުޅޭ ފަރާތްތަކުން ދެމުންދާ އެއްބާރުލުމަށް ޝުކުރުއަދާކުރާ ކޮށްފަ އެވެ.