އިނގިރޭސީ ޕްރިމިއާ ލީގުގައި ބޯންމަތުން 1-3 ގެ ނަތީޖާއިން ބަލިކޮށް މެންޗެސްޓާ ސިޓީ ވަގުތީ ގޮތުން ތާވަލުގެ ދެވަނައަށް ޖެހިލައިފި އެވެ.
އިއްތިހާދު ސްޓޭޑިއަމްގައި ކުޅުނު މި މެޗުގެ ދެ ގޯލު ހާލަންޑު ޖަހާފައިވާއިރު ތިން ވަނަ ގޯލު ޖަހާފައިވަނީ ނިކޯ ރެއިލީ އެވެ. ފުރަތަމަ ގޯލު 17 ވަނަ މިނެޓުގައި ރަޔަން ޗާކީ ތަނަވަސްކޮށްދިން ފުރުސަތަކުން ހާލަންޑު ގޯލު ޖަހާފައިވާއިރު، ދެވަނަ ގޯލު 33 ވަނަ މިނެޓުގައި އޭނާ ޖެހީ ކީޕަރު ކަޓުވާލުމަށްފަހު އެވެ. މި ގޯލުވެސް ޖަހަން އެހީވީ ރަޔަން ޗާކީ އެވެ. ތިން ވަނަ ގޯލު ނިކޯ ރެއިލީ 60 ވަނަ މިނެޓުގައި ޖަހާފައިވަނީ ފޮޑެން ތަނަވަސްކޮށްދިން ފުރުސަތަކުންނެވެ.
ބޯންމައުތްގެ ހަމައެކަނި ގޯލު 25 ވަނަ މިނެޓުގައި ޖަހާފައިވަނީ ޓައިލާ އެޑަމްސް އެވެ. މި ގޯލު ޖަހާފައިވަނީ ލިބުނު ކޯނަރަކުންނެވެ.
މި މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔަ ނަމަވެސް ގޯލަށް ގިނަ ހަމަލާ ފޮނުވާލާފައިވަނީ ސިޓީ އިންނެވެ.
މި މޮޅާއެކު ސިޓީ ދެވަނައިގައި އޮތީ 10 މެޗުން 19 ޕޮއިންޓް ހަމަކޮށްގެންނެވެ. އާސެނަލް އެއްވަނައިގައި އޮތީ 25 ޕޮއިންޓާއެކު އެވެ. ތިން ވަނައިގައި ލިވަޕޫލް 18 ޕޮއިންޓާއެކު އޮތްއިރު ހަމަ އެ އަދަދަށް ޕޮއިންޓް ހޯދައިގެން ހަތަރު ވަނައިގައި އޮތީ ބޯންމައުތް އެވެ.
ސަންދަލެންޑާއި އެވަޓަން ބައްދަލަކުރާ މެޗު މާދަމާ ރޭ އޮންނައިރު އެ މެޗުގެ ނަތީޖާގެ ސަބަބުން ތާވަލަށް ބަދަލުތަކެއް އަންނާނެ އެވެ. އެ މެޗުން ސަންދަލެންޑް މޮޅުވެއްޖެ ނަމަ ދެވަނަ މަގާމު އަލުން އެ ކުލަބަށް ލިބޭނެ އެވެ.
